Քադաֆիի որոշումը` խաղաղ բնակչության դեմ զենք կիրառելու վերաբերյալ, կարող է գնահատվել որպես մարդկության դեմ հանցագործություն: Այս մասին ասված է ՄԱԿ-ի Մարդու իրավունքների խորհրդի բանաձևի մեջ, որն ընդունվել է երեկ:
Մարդու իրավունքների խորհրդի բանաձևում նաև նշվում է, որ «բոլոր նրանք, ովքեր մեղավոր են այս հանցագործության համար, պետք է պատասխանատվության ենթարկվեն»: Հավանական է, որ Հաագայի միջազգային քրեական դատարանը շուտով գործ սկսի` Քադաֆիին պատասխանատվության ենթարկելու ուղղությամբ:
«Առաջին լրատվականը» երեկ տեղեկացրել էր, որ այս խորհուրդը նիստ է գումարելու` քննարկելու համար Լիբիայում ստեղծված իրավիճակը: Հենց նիստի սկզբին Լիբիայի դեսպանն այս խորհրդում հրաժարվեց լիբիական իշխանությունների հետ համագործակցելուց` դիմելով ՄԱԿ-ին անհապաղ միջամտել Լիբիայում տեղի ունեցող իրադարձություններին:
Տեղեկացնենք նաև, որ երեկ Լիբիայի իշխանությունների հետ համագործակցելուց հրաժարվել է նաև մեկ այլ դիվանագետ` Պորտուգալիայում այդ երկրի դեսպան Ալի Իբրահիմ Էմբորեսը` դա պատճառաբանելով «ֆաշիստական ռեժիմի գործողություններով սեփական ժողովրդի դեմ»: Այս մասին հաղորդում է Associated Press գործակալությունը: