Ինչպես հաղորդում է Коомерсант-ը, երեկ մի խումբ ահաբեկիչներ հարձակվել են Կաբարդինո-Բալկարիայի Հանրապետության մայրաքաղաք Նալչիկի վրա:
Հարձակման թիրախ են դարձել Անվտանգության դաշնային ծառայության շենքը և պարեկային կետերը քաղաքի տարբեր մասերում: ՌԴ իշխանությունները հայտնում են, որ այս հարձակման հետևանքով վիրավորվել է 10-12 մարդ:
Սակայն ահաբեկիչներից և ոչ մեկը չի ձերբակալվել կամ վնասազերծվել, նրանց հաջողվել է անարգել հեռանալ քաղաքից: РИА-Новости գործակալությունը փոխանցում է, որ հարձակումից ի վեր իրավապահներն իրականացնում են ահաբեկիչներին հայտնաբերելու գործողություններ:
Հիշեցնենք, որ հյուսիսկովկասյան այս հանրապետությունում վերջին մի քանի օրերի ընթացքում աղմկահարույց ահաբեկչական գործողություններ են իրականացվել: Մասնավորապես` հարձակման էր ենթարկվել Մոսկվայից առողջարանային այս շրջան ժամանած զբոսաշրջիկների խումբը, որի հետևանքով զոհվել էր 3 մարդ, իսկ դրանից մեկ օր անց պայթեցվել էր Էլբրուսի ստորոտում գտնվող ճոպանուղին: Այս դեպքում հնարավոր էր եղել խուսափել զոհերից:
