Ազգագրագետ Հրանուշ Խառատյանը տարօրինակ է համարում ՀԱԿ անդամ Հրանտ Բագրատյանի այն հայտարարությունը, թե ընդդիմության միասնական թեկնածուին պետք է առաջադրի ժողովուրդը:
«Շատ տարօրինակ ընտրության ձև է: Եթե ճիշտն ասեմ՝ պարոն Բագրատյանի հայտարարությունների մեծ մասն ինձ համար մի քիչ անորոշ են, այդ թվում՝ տնտեսական վերլուծությունները, հատկապես իր վարչապետական շրջանի ամփոփումները:
Ես չեմ պատկերացնում` ինչ է նշանակում ժողովրդի կողմից առաջադրված թեկնածու: Հիմա ի՞նչ է՝ բուհերը պետք է ժողով անեն, առաջադրեն իրենց թեկնածուների՞ն: Պարզ է, որ մենք որոշակի քաղաքական համակարգի մեջ ենք: Մենք կուսակցական սկզբունքներով ենք գնում, կան հստակ կուսակցություններ, կան արդեն ռեսուրսներ հավաքած կուսակցություններ: Որքան կուսակցության ռեսուրսը մեծ է, այնքան նրա հավանականությունը մեծ է»,- այսօր լրագրողների հետ հանդիպմանն ասաց Հրանուշ Խառատյանը:
Անդրադառնալով Ռուբեն Հայրապետյանի հարցազրույցին և կոնկրետ իր հասցեին հնչեցրած մեղադրանքներին` Հրանուշ Խառատյանը նշեց. «Նրա համար սրա կամ նրա մարդ լինելը առանցքային հարց է»:
Ըստ Խառատյանի՝ նույն տրամաբանությամբ էլ Ռուբեն Հայրապետյանը վերաբերվում է դիմացինին՝ հայտարարելով, թե Հրանուշ Խառատյանը կամ Գարեգին Չուգասզյանը պատվերներ են կատարում: «Էդ մարդու ուղեղում քաղաքական գործունեության և կողմնորոշումների տեսակը մի տեսակ է՝ դու էսինչի մարդն ես: Նա սրանով արտահայտում է այն, որ Հայաստանում քաղաքական գործիչ լինելը չի նշանակում Հայաստանի հասարակության խնդիր, չի նշանակում հանրային պրոբլեմ, նշանակում է՝ ում մարդը լինել»,- ասաց նա:
Հրանուշ Խառատյանը նաև ընդգծեց, որ այս հարցազրույցից պարզվում է` Ռուբեն Հայրապետյանը վկա է եղել Պողոս Պողոսյանի սպանությանը: «Ես նորից իրավապահների ուշադրությունը հրավիրում եմ դրա վրա»:
