ԱՄՆ պետքարտուղարությունը փաստացիորեն ուղղել է պետքարտուղար Հիլարի Քլինթոնի հայտարարությունն այն մասին, որ Ջեքսոն-Վենիկի և «Մագնիտսկու օրենքով» սահմանված այցագրային սահմանափակումները չեղյալ հայտարարելու մասին միացյալ օրենքը կարող ընդունվել սեպտեմբերին:
Ավելի վաղ Քլինթոնը նման հայտարարություն էր արել Վլադիվոստոկում տեղի ունեցած Ասիախաղաղօվկիանոսյան տնտեսական համագործակցության գագաթնաժողովից հետո:
Ինչպես հաղորդում է RIA Novosti-ն, ըստ պետդեպի՝ խոսելով սեպտեմբերին օրենքի ընդունման մասին՝ Քլինթոնը նկատի ուներ միացյալ մի օրինագիծ, որ կընդգրկեր առևտրական և իրավապաշտպանական հարցեր: Այս պահին Սենատը քվեարկության է նախապատրաստել միացյալ փաստաթուղթը, այն դեպքում, երբ Ներկայացուցիչների պալատը դեռ դա չի արել:
Քանի դեռ խորհրդականները չեն միավորի օրինագծերը և չեն հաստատի նոր փաստաթուղթը Ներկայացուցըչների պալատում, Կոնգրեսի ամբողջ կազմով օրենքի ընդունման հեռանկարների մասին խոսելը նպատակահարմար չէ: Ընդունված փորձի համաձայն՝ ԱՄՆ Կոնգրեսի երկու պալատները հաստատում են նույն օրինագծերը, որից հետո հանձնաժողովը կազմում է միասնական փաստաթուղթ, որը ներկայացվում է նախագահի հաստատմանը:
«Դա (օրենքի ընդունման տեմպերը) կախված է Կոնգրեսից և այն ժամկետներից՝ երբ նրանք կսկեն ուսումնասիրել այդ օրինագիծը: Մենք հույս ունենք, որ դա տեղի կունենա հնարավորինս շուտ: Դա ավելի լավ է, քան ուշ»,- ճեպազրույցում հայտնել է ԱՄՆ պետքարտուղարության պաշտոնական ներկայացուցիչ Վիկտորյա Նուլանդը՝ պատասխանելով այն հարցին, թե ինչ նկատի ուներ Քլինթոնը:
Նա նաև նշել է, որ անհրաժեշտ է հնարավորինս արագ կարգավորել ԱՄՆ-ի և Ռուսաստանի միջև առևտրական հարաբերությունները: «Այժմ Ռուսաստանն ԱՀԿ անդամ է, նա կազմակերպությանն անդամակցել է ԱՄՆ-ի աջակցությամբ, իսկ մենք մեր հերթին պարտավորություն ենք վերցրել համապատասխանել ԱՀԿ պահանջերին: Ջեքսոն-Վենիկի գոյություն ունեցող ուղղումը համարվում է այդ պարտավորությունների խախտում և թույլ չի տալիս մեր ընկերություններին օգտվել բոլոր առավելություններից այդ առևտրային կազմակերպության շրջանակներում»,- ասել է Նուլանդը:
