Նորաձևության աշխարհի յուրաքանչյուր խոշոր իրադարձությունից առաջ ի հայտ է գալիս մոդելների քաշի սկանդալային հարցը: Հասարակական կազմակերպությունները կոչ են անում դիզայներներին հրաժարվել չափազանց նիհար աղջիկների ծառայություններից և պայքարել անորեքսիայի դեմ:
Նյու-Յորքի նորաձևության շաբաթն այս առումով բացառություն չէր: Միջոցառման նախաշեմին մամուլում հայտնվել է ռուս մոդել Կիրա Դիխտյարի սկանդալային հարցազրույցը: Այս մասին հաղորդում է Rosbalt.ru-ն:
Աղջիկը պատմել է, թե ինչպես է մոդելներին հաջողվում պահպանել կազմվածքի պահանջվող չափանիշները: Նրա խոսքով՝ իրենք ստիպված են լինում օրական մի քանի տուփ սիգարետ ծխել, ախորժակը ճնշող դեղամիջոցներ ընդունել: Այդ ամենն ուղղված է սովը ճնշելուն:
«Ես լսել եմ այն մասին, որ որոշ աղջիկներ ընդունում են թմրանյութեր՝ նյութափոխանակությունն արագացնելու և քիչ սնվելու համար: Առավել տարածված են հորմոնային ներարկումները: Տեղյակ եմ նաև, որ մոդելները ուտում են հացահատիկի փաթիլներ, որոնք չեն գիրացնում և հագեցածության զգացում են տալիս»,- ասել է Դիխտյարը:
