Այսօր հրավիրված մամուլի ասուլիսում Հայ ազգային կոնգրեսի համակարգող Լևոն Զուրաբյանը, ի պատասխան այն հարցի, թե արդյոք Կոնգրեսը պատրաստվո՞ւմ է գլխավորել հասարակության տարբեր խավերի սոցիալական բողոքը, ասաց. «Մենք բոլորին ենք ցանկանում համախմբել: Ժողովրդի բոլոր մասերը մերն են: Ինչո՞ւ պիտի սոցիալական խմբերին չհամախմբենք: Այսօր անարդարություն է, քրեաօլիգարխիկ ռեժիմի կողմից անթաքույց թալան է: Այդ բոլոր միջոցները, որ կիրառվում են սոցիալական տարբեր խմբերի նկատմամբ, որևէ հիմնավորում չունեն, բացի մոնոպոլիստների դիրքերի ուժեղացումից: Եվ, բնականաբար, մենք նրանց կողմն ենք, սատարելու ենք նրանց պահանջներին և միավորելու ենք բոլորին այս պայքարում, որը պետք է բերի համակարգային փոփոխությունների»:
Անդրադառնալով կոալիցիոն հուշագրին` ՀԱԿ համակարգողը նշեց, որ Հայաստանում հաստատված ռեժիմը կամաց-կամաց սպառվում ու քայքայվում է, և իշխանությունները դիմում են ամենանվաստացուցիչ միջոցներին, որպեսզի պահպանեն գոյությունը. «Արդեն այն հանգամանքը, որ նրանք, ստիպված քաղաքական ռեկետ կիրառելով ԲՀԿ-ի նկատմամբ, կոնսոլիդացնում են իրենց թիմը` նշանակում է, որ նրանց գործերը շատ վատ են, և վերջին ճիգերով փորձում են իրենց շարքերն ամրապնդել»: Լ. Զուրաբյանի խոսքով` իշխանությունները սպառվում են նաև ֆինանսական առումով. «Նրանք վերջին ճիգերով փորձում են իրենց շարքերը ամրապնդել: Եվ միայն դա չէ: Ֆինանսական առումով սպառված է ռեժիմը: Նրանք չեն կարողանում անգամ բյուջեն հավաքել, մարդկանց տարրական կարիքները բավարարել: Չեն վճարում աշխատավարձեր ուսուցիչներին, ոստիկաններին: Ռեժիմը իսկապես սպառվում է մեր աչքերի առաջ: Այնպես որ, այդ հուշագրերը հուսահատական քայլեր են, որոնք ոչինչ չեն տալիս»: