Սյունիքի մարզկենտրոն Կապանի բնակչությունն այսօր երեկոյան քաղաքի մշակույթի պալատին հարող հրապարակում նախատեսում էր բողոքի ակցիա անցկացնել, սակայն Կապանի քաղաքապետարանն ակցիա անցկացնելու թույլտվությունը մերժել է, քանի որ Կապանի ՀԿ-ների կողմից համապատասխան իրազեկումն ուշացմամբ է ներկայացվել քաղաքապետարան: Ըստ օրենքի՝ հավաքներ անցկացնելու իրազեկման թույլտվություն ստանալու գրությունը պետք է 7 օր շուտ ներկայացվի քաղաքապետարան, սակայն Կապանի ՀԿ-ները երկու օր առաջ են ներկայացրել գրությունը: Հետևաբար` ակցիան այսօր չի կայանա, իսկ հետագայում այն անցկացնելու իմաստ չկա, քանի որ արդեն սեպտեմբերի 9-ին Կապանում քաղաքապետի ընտրություններ են: Այս քայլով Կապանի բնակչությունը փորձում էր արտահայտել իր դժգոհությունը քաղաքում առկա բարքերի կապակցությամբ, որոնց արդյունքում ՀՅԴ-ական քաղաքապետ, քաղաքապետի թեկնածու Արթուր Աթայանը ինքնաբացարկ հայտնեց: Արթուր Աթայանը Կապանը ղեկավարել է վերջին 4 տարիներին: Սեպտեմբերի 9-ին կայանալիք ընտրություններին նույնպես նա առաջադրել էր իր թեկնածությունը, սակայն անսպասելիորեն ինքնաբացարկ հայտնեց, իսկ այնուհետև հայտարարություն տարածեց այն մասին, թե քաղաքում նախընտրական մթնոլորտը գնալով թեժանում էր, իսկ իր շրջապատի անձանց վրա ճնշումներ էին գործադրվում: «Ես կարծում էի, թե կլինեն քաղաքակիրթ ընտրություններ, և բոլոր թեկնածուներին հնարավորություն կընձեռվի օրենքով սահմանված կարգով կազմակերպել ընտրական գործընթացը: Սակայն օրեցօր մարզկենտրոնում շիկանում է մթնոլորտը, ու կապանցու քվեին արժանանալու համար կիրառվում են անընդունելի մեթոդներ: Իմ կողքին կանգնած մարդիկ ենթարկվում են հոգեբանական, ֆինանսական ճնշումների»,- մասնավորապես հայտարարել էր ՀՅԴ-ական քաղաքապետը:
Թեև Արթուր Աթայանը բացահայտ չէր հայտարարել, թե ում կողմից են գործադրվում ճնշումները, պարզից էլ պարզ է, որ այս հարցում խառն է իշխող ՀՀԿ կուսակցության մատը: Բանն այն է, որ Կապանում ՀՀԿ-ն առաջադրել է «Հայփոստ» ՓԲԸ Կապանի մասնաճյուղի տնօրեն ՀՀԿ-ական Աշոտ Հայրապետյանի թեկնածությունը: Եվ քանի որ, որպես կանոն, Հայաստանի համայնքներում սովորաբար հաղթանակ են ունենում գործող քաղաքապետերը (այլ հարց է, որ համայնքապետերի մեծամասնությունը ՀՀԿ-ական են և տարբեր մեթոդներ են կիրառում հաղթանակի հասնելու համար), ՀՀԿ-ի համար Արթուր Աթայանի առաջադրումը մեծ անհանգստություն է դիտվել: Այս պարագայում իշխող կուսակցությանը ոչինչ չէր մնում անելու, քան «արանքից հանել» գործող քաղաքապետին:
Քաղաքապետի մտահոգիչ հայտարարությունից հետո տեղական հեռուստատեսությամբ ելույթ էր ունեցել Սյունիքի մարզպետ Սուրեն Խաչատրյանը՝ փորձելով ժողովրդին հավատացնել, թե ճնշուներ չեն գործադրվել: Բայց Կապանի բնակչության մի մասը, որը քաջատեղյակ է մարզպետի գործելաոճին, չի հավատում Սուրեն Խաչատրյանի խոսքերին: «Առաջին լրատվական»-ի ունեցած տեղեկություններով, քաղաքում լարված մթնոլորտ է, դժգոհ են անգամ ՀՀԿ համախոհները, իսկ քաղաքապետ Արթուր Աթայանն այս օրերին բացակայում է հանրապետությունից:
Նշենք, որ ընտրություններում ՀՀԿ թեկնածու Աշոտ Հայրապետյանը միայնակ է «պայքարելու» քաղաքապետի աթոռի համար, քանի որ Արթուր Աթայանից ավելի շուտ ինքնաբացարկ էին հայտնել նաև երկու անկուսակցական թեկնածուները:
ՀՀԿ Սյունիքի տարածքային կազմակերպության կազմակերպիչ Արտյոմ Սարգսյանը «Առաջին լրատվական»-ի հետ զրույցում հերքեց, որ ՀՀԿ գործիչները Կապանում որևէ մեկի վրա ճնշում են գործադրել:
– Այդ դեպքում, ինչո՞ւ քաղաքապետը ինքնաբացարկ հայտնեց և նման հայտարարություն արեց:
– Իրանից հարցրեք, ես ի՞նչ իմանամ:
– Նա արդեն հայտարարել է, որ պատճառը ճնշումներն էին:
– Չէ՛, դա չի: Ինքը հաշվարկ ա արել, որ չի կարա հաղթի: Դե հիմա պայքար ա, քանի հոգի էլ դնեն, մեկ ա` մյուսը պիտի անցնի: Մարդիկ հաշվարկ արել են, երևի տեսել են, որ չեն հաղթի, դրա համար:
– Իսկ ինչո՞ւ եք այդքան վստահ, որ գործող քաղաքապետը չէր հաղթի, և ինչո՞ւ եք այդքան վստահ, որ հաղթելու էր հենց ձեր թեկնածուն:
– Դե, որովհետև վստահ եմ, դրա համար եմ ասում:
– Իսկ տեղյա՞կ եք, որ բնակչությունը դժգոհ է, մարդիկ պատրաստ են անգամ բողոքի ակցիաներ կազմակերպել:
– Բնակչությունն ինչքա՞ն նկատի ունեք, 50 հոգի՞: Դեմոկրատական երկիր ա, բա իհարկե կարող ա անեն, ի՞նչ ա եղել: Դուք Երևանում եք, դե եկեք Ղափան, տեսեք՝ ժողովուրդը դժգո՞հ է, թե՞ դժգոհ չի:
