Բրիտանական The Daily Telegraph թերթը, վկայակոչելով արևմտյան հետախուզական ծառայություններին, հայտնում է, որ Իրանի նախագահ Մահմուդ Ահմադինեժադն անձամբ է ստորագրել Իսլամական հեղափոսխության պահակազորի 150 սպաների Սիրիա ուղարկելու հրամանը: Այդ սպաները պետք է աջակցեն Սիրիայի նախագահ Բաշար Ասադին ապստամբների դեմ պայքարում:
Թերթի տվյալներով՝ իրանցի սպաներն իրենց հետ Սիրիա են բերել հարյուրավոր տոննա ռազմական բեռ՝ զենք, հրթիռներ, ռազմական հանդերձանք: Իրանն այդպիսի օգնություն ուղարկելու մասին որոշումը կայացրել էր 2012 թվականի հուլիսին՝ Սիրիայի պաշտպանության նախարարի զոհվելուց հետո:
Օգոստոսին սիրիացի ապստամբները հայտարարեցին Իրանի 48 քաղաքացիների ձերբակալման մասին: Բրիտանական թերթը վստահեցնում է, որ դրանց թվում առկա են եղել նաև այդ 150 սպաներից ոմանք: Այն ժամանակ իրանական կողմը հայտարարեց, որ պատանդների թվում կան Իսլամական հեղափոխության պահակազորի նախկին անդամներ, որոնք այժմ միայն ուխտավորներ էին:
