Գյումրի քաղաքում գործող «Քաղաքը մերն է» քաղաքացիական նախաձեռնությունը ՏԻՄ ընտրություններում առաջադրել է ավագանու 7 թեկնածու: «Առաջին լրատվական»-ի հետ զրույցում նախաձեռնության կողմից առաջադրված թեկնածուներից Կարեն Պետրոսյանն ասաց, որ իրենք ներկայացրել են հստակ ծրագիր և առաջարկել դրա լուծումները. «Մեր ընդհանուր քարոզարշավը թիմային է, ունենք մոտավորապես հիսուն էջանոց հստակ ծրագիր, որտեղ նշված են բոլոր ոլորտներին վերաբերող խնդիրներ: Կարևորներից մեկը բյուջեի արդյունավետության բարձրացման ծրագիրն է»:
Նա ասաց նաև, որ քաղաքում կան աղբահանության, ընդհանուր բնապահպանական խնդիրներ, պետք է երիտասարդներին ներգրավել հանրային կյանքում, հարկային դաշտին ուշադրություն դարձնել. «Եթե լինեն արդար ընտրություններ, և մենք ունենանք 7 ընտրված ավագանու անդամներ, կկարողանանք մեր ձայնը բարձրացնել և բարեփոխել Գյումրին. «Մենք ունենք մոտ 250 վստահված անձ, ամեն ընտրատեղամասում՝ 3-ական: Նրանք մինչև արձանագրության կազմումը լինելու են ընտրատեղամասերում, և եթե որևէ խախտում նկատվի, նորից վերահաշվարկ ենք պահանջելու»,-եզրափակեց Կարեն Պետրոսյանը:
