Այսօր քարոզարշավի վերջին օրն է: Եթե հաշվի չառնենք այս երկու շաբաթվա ընթացքում Գյումրիում հնչած կրակոցներն ու խուլիգանական մանր-մունր արարքները, օրինակ` ասենք, քաղաքապետի թեկնածուներից մեկի բուկլետները բաժանող երիտասարդ տղաներին Պոլիգոն թաղամասում ահաբեկելը, ապա պետք է ասենա, որ քարոզարշավն անցավ անցնցում, առանց ինտրիգների:
«Քաղաքը մերն է» քաղաքացիական նախաձեռնության կողմից առաջադրված ավագանու անդամի թեկնածուներից մեկը` Կարինե Մկրտչյանը, «Առավոտ»-ի հետ զրույցում կարծիք հայտնեց, որ այս անգամվա քարոզարշավը շատ ավելի հանգիստ անցավ, քան նախորդ տարիներին: «Շատ լավ անցավ, եթե ի նկատի ունենանք, որ մի միջադեպ գրանցվեց` Վարդան Ղուկասյանի տղայի և ավագանու անդամության թեկնածուի միջև, անունը չեմ հիշում, դրանից զատ` ընդհանուր առմամբ բացահայտ կերպով քաղաքակիրթ ձևով է գնում, բայց թաքնված շերտը կա, երբ որ արդեն թաղային հեղինակություններ են մասնակցում, մութը ընկնում է, սև գույնի մեքենաները սկսում են շրջել թաղերով, էսպես կոչված՝ լավ տղաներին պարտադրում են ձայներ հավաքել, դա չերևացող մասն է: Նախքան քարոզարշավը սկսվելը` մեր խմբի 7 թեկնածուները գիտեին, որ թաղամասերում ինչ բաժանումներ են տեղի ունեցել, քաղաքը արդեն բաժանված էր: Առաջադրումների հետ կապված էլ ասեմ, որ այս անգամ ունեցանք 71 ավագանու թեկնածու` 7 կին: Ցանկացած դեպքում սա աննախադեպ երևույթ է Գյումրիի համար` տարբեր խմբեր, նախաձեռնություններ, քաղաքական կուսակցությունների թիմեր, նույնիսկ ներկայիս գործող քաղաքապետի թիմակիցներ, էս առումով բազմազան ու բազմերանգ է, ես դրական եմ գնահատում»:
Այս բազմազանության մեջ Կարիեն Մկրտչյանին զարմացրել է այն, որ որևէ մեկը հրապարակային խոսքով հանդես չի եկել, այս մարդիկ բավարարվել են միայն իրենց «պասպորտի» նկարները պատերին փակցնելով ու ծննդյան տարեթվերը ներկայացնելով:
Իսկ ի՞նչ կարծիք ունեն քարոզարշավի մասին քաղաքապետի թեկնածուները, օրինակ` Գյումրու քաղաքապետի որդու` Սպարտակի ռազբորկաները ազդեցի՞ն արդյոք ԲՀԿ-ական թեկնածու Սամվել Բալասանյանի քարոզարշավի ընթացրի վրա:
«Չէի ասի, թե ազդեց, ես դատապարտում եմ նման դեպքերը, չլիներ, շատ լավ կլիներ, իմ քարոզարշավը իր գրաֆիկով կարողացա նորմալ անցկացնեի բնակչությունը, բնականաբար, այս հարցը բարձրացրեց, մենք պետք է կարողանանք ձերբազատվել այսպիսի դեպքերից, քաղաքակիրթ առաջընթաց ունենալ` երիտասարդներին ճիշտ դաստիարակելու համար, մենք պետք է այնպես անենք, որ գյումրեցի երիտասարդը չգնա ու մնա Երևանում, Ռուսաստանում, նա պետք է հետ գա: Եթե կարողանանք էս ամեն ինչը անել, ամենամեծ խնդիրը լուծած կլինենք, այլապես այսօր Գյումրի քաղաքը ծերերի ու հաշմանդամների քաղաք է դարձել»,- ասաց Սամվել Բալասանյանը: