Ռուսական Интерфакс լրատվական գործակալության փոխանցմամբ՝ Ռուսաստանի սպառողների շահերի վերահսկիչ մարմինը (Роспотребнадзор) պատրաստ է մասնագետներ ուղարկել Վրաստան՝ ստուգումներ անցկացնելու համար գինի և հանքային ջուր արտադրողների մոտ: Այս մասին հայտարարել է Ռուսաստանի գլխավոր սանիտար Գենադի Օնիշչենկոն.
«Վրացական գինի և հանքային ջուր արտադրողների մեծ մասը փաստաթղթեր են ներկայացրել ռուսական շուկա վերադառնալու համար, սակայն դրան խոչընդոտում են Վրաստանի իշխանությունները: Փոխանակ ասեն՝ եկեք և նայեք, նրանք անհասկանալի և հանդուգն հայտարարություններ են անում:
Դեպի ռուսական շուկա վրացական գինու ու հանքային ջրի վերադարձման համար արհեստական խոչընդոտներ չկան: Կա տեխնիկական խնդիր. մենք պետք է գնանք Վրաստան և տեղում տեսնենք այն: Դա վերաբերում է «Բորժոմիին» և գինուն: Մենք կգայինք, մեկ-երկու օր կզբաղվեինք այդ հարցերով, կվերադառնայինք և կասեինք՝ այո, այդ ձեռնարկությունները համապատասխանում են մեր պահանջներին: Եվ վերջ: Հետո, երբ նրանք կներկայացնեն գինին, մենք կանցկացնեինք լաբորատոր վերահսկողություն»:
Հիշեցնենք, որ Ռուսաստանը վրացական գինու և հանքային ջրի ներկրման վրա բեռնարգելք է դրել 2006 թվականին:
