Lufthansa ավիաընկերության բորտուղեկցորդների արհմիությունը հայտարարել է հերթական գործադուլի անցկացման մասին,- հաղորդում է Associated Press-ը: Արհմիության հայտարարության համաձայն՝ գործադուլը տեղի կունենա 2012 թ. սեպտեմբերի 7-ին: Այն կանցկացվի Գերմանիայի միանգամից մի քանի խոշոր քաղաքներում՝ Բեռլինում, Ֆրանկֆուրտում, Համբուրգում, Դյուսելդորֆում, Շտուտգարտում և Մյունխենում:
Ավիաընկերությունն արդեն հայտնել է 1200 չվերթներ հետաձգելու մասին:
Հիշեցնենք, բորտուղեկցորդների առաջին գործադուլը տեղի է ունեցել օգոստոսի 31-ին Մայնի Ֆրանկֆուրտի օդանավակայանում, երկրորդը՝ սեպտեմբերի 5-ին: Արհմիությունը պահանջում է 5 տոկոսով բարձրացնել աշխատակիցների աշխատավարձը և վերանայել աշխատանքային պայմանագրի մի քանի կետ: Իր հերթին, Lufthansa-ի ղեկավարությունը առայժմ պատրաստ է աշխատավարձերը բարձրացնել 3.5 տոկոսով:
