«Թումո» ստեղծարար տեխնոլոգիաների կենտրոնում անցած ուսումնական տարում գրանցված արդյունքները գերազանցել են սպասելիքները: Ինչպես «Առաջին լրատվական»-ին հայտնեցին կենտրոնից, սեպտեմբերի առաջին երկու շաբաթների ընթացքում «Թումո»-ում արդեն գրանցվել էին ավելի քան 3500 պատանիներ: Ոգևորիչ էր նաև այն փաստը, որ 10 պատանիներից 4-ը աղջիկներ էին: Իսկ մեկ տարի անց արդեն «Թումո»-ում ուսուցանում է մոտ 6,500 պատանի:
Այս մեկ տարվա ընթացքում փորձարկվել է «Թումո»-ի ուսումնական ծրագիրը, անդամների ակտիվ մասնակցության շնորհիվ որոշակի շտկումներ են կատարվել ծրագրում, և այն ավելի է կատարելագործվել: Կենտրոնից նշեցին, որ տարին լի էր նաև հետաքրքիր միջոցառումներով, պատանիները կարողացան աշխատել մի շարք իրական նախագծերի վրա և հասնել շոշափելի արդյունքների:
«Թումո»-ի նման կրթական կենտրոններ աշխարհում գրեթե չկան: Այն առաջարկում է նորարարական ուսումնական ծրագիր իր սաների համար, որը յուրաքանչյուր անդամի թույլ է տալիս ստեղծել իր ուսումնական պլանը և կազմակերպել ուսուցման ընթացքը իր կարողություններին համապատասխան:
«Մեզ շատ է ոգևորում այն մեծ ներուժը, որով օժտված են հայ պատանիները: Մի բան ակնհայտ է` «Թումո»-ի առաջարկած ծրագիրը պատանիներին հնարավորություն է ընձեռում համահունչ քայլելու համաշխարհային զարգացումների հետ և հասնելու բարձունքների իրենց ընտրած ոլորտում»,- նշեցին «Թումո»-ից:
Կենտրոնի սաների 60% -ը տղաներ են, 40%-ը՝ աղջիկներ: Ե՛վ աղջիկները, և՛ տղաները ակտիվորեն մասնակցում են կենտրոնում իրականացվող կրթական միջոցառումներին: Այսօր արդեն նորարար տեխնոլոգիաները գրավիչ են ոչ միայն տղաների, այլ նաև աղջիկների համար: Աղջիկների աճ է նկատվում այնպիսի ոլորտներում, որոնցով նախկինում առավել հետաքրքրված էին տղաները: Անցյալ տարվա ընթացքում «Թումո»-ն պարբերաբար կազմակերպում էր ռոբոտաշինության դասընթացներ, որոնց մեծ ոգևորությամբ մասնակցում էին նաև աղջիկներ:
12-16 տարեկան 300-ից ավելի պատանիներ արդեն դիմել են` ընդունվելու «Թումո» կենտրոն: Հաշվի առնելով պատանիների ոգևորությունը և նոր գիտելիքներ ստանալու նրանց մեծ ցանկությունը՝ ակնկալվում է, որ այս տարվա ընթացքում ավելի հետաքրքիր ծրագրեր և ոգևորիչ արդյունքներ կլինեն: Այս տարի նախատեսվում է ներգրավել ավելի շատ տեղացի և արտերկրի մեդիա ոլորտի մասնագետների՝ պատանիների համար կազմակերպելով դասընթացներ, տեսադասեր և վիդեո կոնֆերանսներ:
