Տեղեկատվական անվտանգության փորձագետ Սամվել Մարտիրոսյանի կարծիքով՝ Ադրբեջանը, հատկապես Արցախյան պատերազմում պարտվելուց հետո, հերոսի կարիք ուներ և Սաֆարովի ազատ արձակմամբ փորձեց լուծել այդ խնդիրը. «Ադրբեջանը, հատկապես երիտասարդության շրջանում, հերոսի կերպարի ստեղծման կարիք ուներ, սակայն իր ընտրությունն այդ պետությունը սխալ է կատարել»:
Ինչ վերաբերում է Սաֆարովի արտահանձնումից հետո սկսված կիբերհարձակումներին, փորձագետն ասաց, որ հենց այդ երեկոյան ադրբեջանցիները սկսեցին հարձակվել հայկական ցանկացած կայքի վրա և ինչ կարող էին` կոտրում էին: Նրանք կոտրում էին քաղցկեղով հիվանդ երեխաների և մանկատներին օգնող հիմնադրամների կայքերը: Մեկ օրվա ընթացքում ընդհանուր առմամբ մոտ 20 կայք է կոտրվել. «Ի տարբերություն դրա՝ մերոնք հարձակվում էին թիրախային լսարան ունեցող կայքերի վրա: Հիմնական թիրախը նախագահի և մեծ լսարան ունեցող կայքերի կոտրումն էր կամ DDoS հարձակման ենթարկելը»:
Ադրբեջանական պաշտոնական կայքերից հայ հաքերները կոտրել են նախագահականը, մշակույթի, տրանսպորտի և կապի նախարարության կայքերը. «Մեր հարձակումների ժամանակ շատ կայքեր ուղղակի անջատել էին, որպեսզի չկոտրվեին»,- նշեց պրն Մարտիրոսյանը:
Ինչ վերաբերում է հարցի բարոյահոգեբանական կողմին, ապա հոգեբանական գիտությունների դոկտոր Սամվել Խուդոյանն ասաց, որ այս պատմությունը բարոյահոգեբանական խորը հիմքեր ունի. Ադրբեջանը սրանով ուզում է մեզ ճնշել. «Փոխարենը աշխարհը շատ բացասաբար անդրադարձավ Ադրբեջանի այս քայլին, սրանով միայն ապացուցվեց հայերի ասած յուրաքանչյուր բառի ճշմարտացիությունը»:
Հոգեբանն ասաց նաև, որ Սաֆարովը ուղղակի գործիք է ադրբեջանական իշխանությունների ձեռքին, նրա լուսանկարներում չկար անկեղծ ուրախություն. «Ամեն ինչ բեմականացված էր: Սաֆարովը լավ առիթ է՝ ադրբեջանցու տեսակը աշխարհին ցույց տալու»:
