ԱԺ առաջիկա նիստում կքննարկվի բյուջեի կատարողականը և գնահատական կտրվի կառավարության գործունեությանը: Քաղաքական շրջանակներում սպասում են ԲՀԿ քվեարկությանը: Ըստ այդմ` թերևս պարզ կլինի` կա՞ պայմանավորվածություն ՀՀԿ-ի ու ԲՀԿ-ի միջև նախագահական ընտրություններին ընդառաջ, և կհայտարարի՞ ԲՀԿ-ն Սերժ Սարգսյանի թեկնածությունը սատարելու մասին, թե՞ ոչ: ԲՀԿ խմբակցության պատգամավոր, ԱԺ մարդու իրավունքների հանձնաժողովի նախագահ Էլինար Վարդանյանը կարծում է, որ ԲՀԿ-ն կողմ չի քվեարկի կառավարության գործունեությանը, քանի որ կողմ քվեարկելու հիմքեր, ըստ նրա, չկան:
– Տիկին Վարդանյան, ԱԺ առաջիկա նիստում ինչպիսի՞ն է լինելու ԲՀԿ-ի գնահատականը կառավարության գործունեությանը և ինչպե՞ս է քվեարկելու ԲՀԿ-ն:
– Անկեղծ ասած, բյուջեի կատարողականն առայժմ մեզ ներկայացված չէ: Առայժմ ներկայացրել են ժամանակացույցը, թե որ հանձնաժողովներում և ինչ օրակարգով է քննարկվելու: Այնպես որ, նախապես ոչինչ ասել չեմ կարող: Սպասենք բյուջեի կատարողականին:
– ԲՀԿ-ն մայիսին դեմ քվեարկեց կառավարության ծրագրին, հիմա հնարավո՞ր է` կողմ քվեարկի գործունեությանը:
– Չեմ կարծում, որովհետև անկեղծ ասած, կառավարության ծրագիրը կարծես նախորդ ծրագրի անհաջող կրկնությունն էր, առաջնահերթությունները ինչ-որ առումով փոփոխած: Բյուջեի կատարողականին կողմ կամ դեմ քվեարկելը քննարկման արդյունք պետք է լինի, սակայն եթե հաշվի առնենք կառավարության գործունեության արդյունքները և երկրում առկա իրավիճակը, որ ունենք, դրական վերաբերմունքի տեղ չի թողնում:
– Ասել է թե` ԲՀԿ-ն դեմ կքվեարկի բյուջեի կատարողականին:
– Մենք կքննարկենք, առանց քննարկման հնարավոր չէ դա ասել: Սակայն եթե հաշվի առնենք Հայաստանի տնտեսական իրավիճակը, դրական կարծիքի տեղիք չի տալիս: Մինչ քվեարկելը ամեն դեպքում քննարկում կլինի մեզ մոտ:
– Տիկին Վարդանյան, մամուլում տեղեկություններ կան, որ ԲՀԿ ղեկավար Գագիկ Ծառուկյանը բանակցություններ է վարում Սերժ Սարգսյանի հետ սատարման հետ կապված և վարչապետի փոփոխության ու կառավարության 30 տոկոսի պայման է դրել:
– Էդպիսի պաշտոնական հայտարարություն չի եղել: Էն, ինչ մամուլում եղել է, ոչ պաշտոնական բնույթ է կրում, ուստի ես դա չեմ կարող մեկնաբանել:
– Այնուամենայնիվ հնարավո՞ր է ԲՀԿ-ն սատարի Սերժ Սարգսյանին` ինչ-ինչ զիջումների դիմաց:
– Նախագահական ընտրությունների վերաբերյալ առայժմ ԲՀԿ-ում քննարկումներ չեն եղել և դեռ ԲՀԿ օրակարգում այդ հարցն ընդգրկված չէ: Եվ միանշանակ` քննարկումներում որևէ եզրակացության գալուց հետո մենք այդ մասին տեղյակ կպահենք:
– Ասացիք` չեք կարծում, որ ԲՀԿ-ն կողմ քվեարկի կառավարության կատարողականին: Ասել է թե` կշարունակի պահպանե՞լ ընդդիմադիրի կեցվածքը մինչ նախագահական ընտրություններ:
– ԲՀԿ-ն կոալիցիայի անդամ չէ, հետևաբար իշխանություն չէ: Ես ասացի, որ կատարողականը չի քննարկվել, և դա իմ տեսակետն է, որ դրական վերաբերմունքի քիչ շանսեր ունի: Եթե խմբակցության քննարկման ժամանակ կորոշվի դեմ քվեարկել, միանշանակ էդպես կքվեարկվի: Ընդդիմադիր լինելը ԲՀԿ համար ինքնանպատակ չէ: Էնպես չէ, որ մենք պատրաստվում ենք ցանկացած նախաձեռնությանը դեմ գնալ, որովհետև պարզապես ընդդիմադիր ենք, այլ դա պետք է լինի երկրի շահերից ելնելով:
– Ճի՞շտ է, որ Գագիկ Ծառուկյանն ուզում է ինքն առաջադրվել որպես նախագահի թեկնածու:
– Նման հարց չի քննարկվել, և շշուկները, որոնք կան, պարզապես ենթադրությունների արդյունք են:
– Ռոբերտ Քոչարյանի սատարելու, նրան ասպարեզ բերելու հարցը վաղուց է շրջանառվում: Այդ առթիվ ի՞նչ կասեք:
– Նախագահական ընտրություններն առայժմ չեն քննարկվել ԲՀԿ-ում:
– Այսօր Հայաստանում քննարկման թեման Հունգարիայում կատարվածն է: Ինչպե՞ս եք գնահատում այստեղ անցկացված ակցիաները, երբ հանրապետական պատգամավոր Կարեն Ավագյանի գլխավորությամբ Հունգարիայի հյուպատոսության ուղղությամբ լոլիկ են շպրտում, Հունգարիայի դրոշն են այրում:
– Ես նման ակցիաների նպատակահարմարությունը չեմ կիսում, խոսքն ագրեսիվ լոլիկներ նետելու մասին է, որովհետև դրա էֆեկտիվությունը չեմ տեսնում` անկեղծ ասած և քաղաքակիրթ երկրում չեմ կարծում, որ էդպիսի բան կարելի էր իրեն թույլ տալ:
– Այսինքն` դատապարտո՞ւմ եք նման ակցիաները:
– Այո՛, դատապարտում եմ: Էստեղ ճիշտ քաղաքականություն է պետք դրսևորել և լոլիկներով հարց չի լուծվում ամեն դեպքում: Միջոցառումները պետք է ուղղված լինեն Հունգարիայի իշխանության դեմ, որովհետև Հունգարիայի ժողովուրդն այս հարցում պատասխանատու չէ: Որոշումը կայացրել են հունգարական իշխանությունները և լոլիկներով հարց չի լուծվում:
Լուսանկարը՝ Civilnet-ի
