Բնութագրելով Հայաստանում տիրող ներքաղաքական մթնոլորտը` ՀՀՇ վարչության նախագահ Արամ Մանուկյանը լրագրողների հետ հանդիպման ժամանակ ասաց.
«Մենք մտնում ենք որակապես նոր փուլ: Դրա հիմնական բնութագրիչներն են` ներքին սոցիալական լարվածությունը,ներիշխանական զարգացումները և արտաքին աշխարհից եկող տաք քամիները, ինչպես նաև այն, որ գարուն է գալիս»:
Մանուկյանը նշեց, որ գարունը հույս և ակնկալիքներ է բերում, ինչպես նաև մի տխուր բան` Մարտի 1-ը մեր պետականության խարանն է:
«Մարտի 1-ի ողբերգական դեպքերի 3-րդ տարելիցը մենք նշելու ենք, բայց ոչ որպես լացի,այլ ըմբոստացման դրսևորում»,-ասաց Արամ Մանուկյանը:
ՀՀՇ վարչության նախագահը փոխանցեց,որ իրենք անելու են հնարավորինը` գործընթացները ակտիվացնելու համար և հրապարակ են բերելու անգամ «խոհանոցային» ընդդիմությանը:
Մանուկյանը նշեց, որ «խոհանոցային» ընդդիմություն են այն մարդիկ, ովքեր իրենց բողոքը արտահայտում են իրենց տանը` բազմոցներին նստած:
Անդրադառնալով արաբական աշխարհից եկող տաք քամիներին Մանուկյանը ասաց, որ այդ տաք քամիները մեր պայքարը պարզապես էլ ավելի են ակտիվացնում:
«Արաբական աշխարհի հեղափոխությունը չլինեին էլ մենք շարունակելու ենք մեր պայքարը, դրանք պարզապես տաքացրին և նպաստեցին մեր հույսի վերականգնմանը»:
Արամ Մանուկյանը վստահեցրեց,որ արաբական աշխարհի իրադարձությունները ունենալու են դոմինոյի էֆեկտ:
