Բրիտանիայի իշխանությունները Եգիպտոսի նախկին նախագահ Հոսնի Մուբարաքի և նրա ընտանիքի անդամների ու մերձավորների հաշիվները ամբողջությամբ չեն սառեցրել: 3 ամիս տևած քննության արդյունքում նման եզրակացության է եկել BBC-ն:
Լրագրողներին հաջողվել է պարզել, որ Medinvest Associates ներդրումային ընկերությունը, որը գրանցված է Մեծ Բրիտանիայում և պատկանում է Գամալ Մուբարաքին՝ նախկին նախագահի կրտսեր որդուն, պատժամիջոցներ մտցնելուց հետո 11 ամիս շարունակել է գործել: Արդյունքում Մուբարաքը ընկերության ղեկավարների կազմից ինքնակամ է դուրս եկել:
Բացի այդ, BBC-ն պարզել է, որ 2011 թ. նոյեմբերին Եգիպտոսի զբոսաշրջության նախկին նախարար Նագլաա Ալ-Ղազարլեյի կինը Լոնդոնում գրանցել է սեփական ընկերությունը, չնայած այն բանին, որ դրանից 7 ամիս առաջ նրա դեմ պատժամիջոցներ էին սահմանվել:
Բացի այդ, The Guardian թերթը նույնպես սեփական հետազոտության արդյունքներն է հրապարակել, ըստ որի՝ Մուբարաքի որդիներին և նրա կառավարության նախկին անդամներին շարունակում են պատկանել էլիտար տներ Լոնդոնի այնպիսի թաղամասերում, ինչպիսիք են Չելսին և Նայթսբրիջը:
Եգիպտոսի ներկայիս իշխանությունները դիմել են Բրիտանիայի կառավարությանը՝ խնդրելով իրենց հանձնել այն ակտիվները, որոնց մասին խոսվում է լրագրողների հետազոտության մեջ: Ընդ որում, Եգիպտոսի արդարադատության նախարարը նշել է, որ Մեծ Բրիտանիան բոլոր երկրներից ամենավատն է իրականացնում Մուբարաքի դեմ սահմանված պատժամիջոցները: Բացի այդ, Լոնդոնից 37 օր է պահանջվել Եգիպտոսի նախկին նախագահի հաշիվները սառեցնելու համար, այն դեպքում, երբ Շվեյցարիան դա արել է կես ժամում:
Ի պատասխան այդ դիմումի՝ Մեծ Բրիտանիայի արտգործնախարարությունը հայտարարել է, որ իրենք ուսումնասիրում են այդ պահանջի օրինականությունը՝ նախքան նման քայլի դիմելը:
Մուբարաքը հրաժարական է տվել 2011 թ. փետրվարին զանգվածային անկարգություններից հետո: Դրանից հետո, երկրի նոր իշխանությունների խնդրանքով, նրա դեմ պատժամիջոցներ են սահմանվել: Մեծ Բրիտանիան, մասնավորապես, սառեցրել էր նախկին նախագահի և նրա շրջապատի հաշիվները՝ մոտ 135 մլն դոլար:
