Ռուսաստանում գործող հայկական հասարակական կազմակերպությունները հայտարարություն են տարածել, որով իրենց բողոքն են արտահայտել հանցագործ Ռամիլ Սաֆարովի Ադրբեջան էքստրադիցիայի դեմ, գրում է yerkramas.org-ը: Ստորագրած կազմակերպությունների ամբողջական ցուցակին հնարավոր է ծանոթանալ այստեղ`
ՀԿ-ները հայտարարություն են տարածել, որտեղ մասնավորապես ասվում է.
«Ռուսաստանի հասարակական կազմակերպությունների անունից վճռական բողոք ենք հայտնում հանցագործ Ռամիլ Սաֆարովի արտահանձման կապակցությամբ: Նման քայլը ոչ միայն ի ցույց է դնում հայ ժողովրդի նկատմամբ թշնամական վերաբերմունքը, այլ հակասում է արդարության և հիմնարար իրավունքների սկզբունքներին:
Սա ոչ միայն Հունգարիայի, այլև եվրոպական ողջ արժեհամակարգի պարտությունն է: Սա դատական համակարգի պարտություն է, որը ժամանակին համարվում էր միջազգային արդարադատության էտալոնը: Սա հրաժարումն է քրիստոնեական արժեքներից, որոնց հիման վրա է դարեր շարունակ պահպանվում Եվրոպան: Սա հունգարական կառավարության կողմից անհարգալից վերաբերմունք է իր ժողովրդի նկատմամբ:
Իր հարցաքննության ժամանակ Սաֆարովը հայտարարել էր. «Եթե ոչ այսօր և այստեղ, ես իմ արարքը կկրկնեի ցանկացած ժամանակ և ցանկացած վայրում: Եթե այստեղ շատ հայեր լինեին, ես կցանկանայի բոլորին սպանել…»:
Ինչո՞ւ է ԵՄ-ն, որն այդպես ջերմեռանդորեն ձգտում է զարգացնել և պաշտպանել եվրոպական արդարադատության համակարգը, աչքերը փակում նման աղաղակող արարքի վրա: Ինչո՞ւ է ԱՄՆ-ն, որը ողջ մարդկությանը հիշեցնում է ազատ և անկողմնակալ դատարանի մասին, այսօր լռում:
Նման լռությունը անտարբերության և կրկնակի ստանդարտների քաղաքականության ակնհայտ ազդանշան է, որն ուղղված է հայ-ադրբեջանական հակամարտության սրմանը: Հիշեցենենք, որ ԱՄՆ, Ֆրանսիան և Ռուսաստանը ԵԱՀԿ Մինսկի խմբի համանախագահներն են, որոնց ջանքներն ուղղված է խաղաղ կարգավորմանը:
Պատմությունը մեկ անգամ չէ, որ ապացուցել է, որ հայերը թույլ չեն տա խաղալ իրենց ժողովրդի հիշողության հետ: Թող որևէ մեկը չկասկածի, որ հաղթանակը մերն է լինելու, քանի որ միշտ հաղթում է ճշմարտությունն ու արդարությունը: Վստահ եղեք, որ յուրաքանչյուր հայ ձգտելու է արդարության և ճշմարտության»:
