«Բարգավաճ Հայաստան» կուսակցության ղեկավար Գագիկ Ծառուկյանը չի մասնակցել Սերժ Սարգսյանի երեկ հրավիրած Ազգային անվտանգության խորհրդի նիստին: Համենայնդեպս, նա չէր երևում նախագահի կայքում տեղադրված լուսանկարում, որն արվել էր նիստի ժամանակ:
ԲՀԿ մամլո խոսնակ Տիգրան Ուրիխանյանը տեղյակ չէր` արդյոք ԲՀԿ ղեկավարը մասնակցե՞լ է այդ նիստին, թե՞ ոչ: Մինչև ուշ երեկո այդ մասին չկարողացանք տեղեկություն ստանալ նաև նախագահի մամլո գրասենյակից: Հիշեցնենք, որ Սերժ Սարգսյանը ԱԱԽ նիստը հրավիրել էր քննարկելու 2004թ. Հունգարիայում ՀՀ ԶՈւ սպա Գուրգեն Մարգարյանին դաժանաբար սպանած Ադրբեջանի սպա Ռամիլ Սաֆարովին Ադրբեջան տեղափոխելու փաստը և ՀՀ կողմից ձեռնարկվելիք քայլերը: Հիշեցնենք նաև, որ Գագիկ Ծառուկյանը ԱԱԽ անդամ է այդ կառույցից Ավետ Ադոնցի դուրս գալուց հետո: Վերջինս 2008-2009 թվականներին ԱԱԽ անդամ է եղել ԲՀԿ կողմից: Բելգիայի Թագավորությունում դեսպան նշանակվելուց հետո նրան փոխարինել է Գագիկ Ծառուկյանը: Անցած տարի, երբ ԲՀԿ-ն դեռ կոալիցիայի անդամ էր, ԱԱԽ քարտուղար Արթուր Բաղդասարյանը մեկնաբանելով Գագիկ Ծառուկյանի ԱԱԽ անդամ լինելու հանգամանքը՝ այսպես էր հայտարարել. «Այսօր Հայաստանում իշխանության գործունեության համար քաղաքական պատասխանատվություն են կրում երեք կուսակցություններ, որոնք ընդգրկված են պետական կառավարման օղակներում, և այդ որոշումը դրա շրջանակներում է: Միջազգային պրակտիկայում ընդունված է, որ իշխող կուսակցության անդամներն ընդգրկված լինեն ԱԱԽ կազմում»:
Այսօր ԲՀԿ-ն կոալիցիայի անդամ չէ և իշխանության գործունեության համար պատասխանատվություն չի կրում: Ավելին` անխնա քննադատում է իշխանությունների տնտեսական քաղաքականությունը: Այդ դեպքում, ի՞նչ հիմքով է նա շարունակում մնալ ԱԱԽ անդամ: «Շատ սովորական կարգով, օրենքով, տրամաբանությամբ, բարոյականությամբ և մնացած բոլոր հնարավոր նորմերով: Անվտանգության խորհուրդը կառավարման մարմին չէ, իսկ կոալիցիան նշանակում է համատեղ կառավարման ձևաչափ»,- «Առաջին լրատվական»-ի հետ զրույցում ասաց ԲՀԿ մամլո խոսնակ Տիգրան Ուրիխանյանը:
Իսկ թե իրականում իրավական, տրամաբանական, բարոյական ինչ նորմերի արդյունքում է Գագիկ Ծառուկյանը շարունակում մնալ ԱԱԽ անդամ, ԱԱԽ լրատվական ծառայությունից խոստացան պաշտոնապես պատասխանել ավելի ուշ:
Հիշեցնենք նաև, որ ԱԱԽ-ն մայիսի 6-ի խորհրդարանական ընտրություններից հետո առաջին անգամ էր հրավիրել նիստ: Իսկ Գագիկ Ծառուկյանը` որպես ԱԱԽ անդամ, օդանավակայանում մասնակցում է Սերժ Սարգսյանին ճանապարհելու և դիմավորելու արարողություններին: Այսինքն` Գագիկ Ծառուկյանի՝ ԱԱԽ անդամ լինելու պարտականությունը սահմանափակվում է ընդամենը Սերժ Սարգսյանին դիմավորելո՞վ ու ճանապարհելո՞վ:
Հիշեցնենք նաև, որ Անվտանգության խորհրդի անդամներ են ԱԺ նախագահ Հովիկ Աբրահամյանը, վարչապետ Տիգրան Սարգսյանը, ԱԱԽ քարտուղար Արթուր Բաղդասարյանը, ՍԴ նախագահ Գագիկ Հարությունյանը, փոխվարչապետ Արմեն Գևորգյանը, պաշտպանության նախարար Սեյրան Օհանյանը, արտգործնախարար Էդվարդ Նալբանդյանը, նախագահի աշխատակազմի ղեկավար Վիգեն Սարգսյանը, գլխավոր դատախազ Աղվան Հովսեփյանը, ԱԱԾ պետ Գորիկ Հակոբյանը, ոստիկանապետ Վլադիմիր Գասպարյանը, ԶՈւ ԳՇ պետ Յուրի Խաչատուրովը և վերջապես Գագիկ Ծառուկյանը:
ԱԱԽ այս նիստին չեն մասնակցել նաև Էդվարդ Նալբանդյանը և Գագիկ Հարությունյանը: ՍԴ մամլո ծառայությունից տեղեկացրեցին, որ վերջինս Աստանայում է: Ինչպես հայտնի է, Է. Նալբանդյանն էլ Թեհրանում մասնակցում է Չմիավորման երկրների շարժման գագաթնաժողովին: Նրա փոխարեն մասնակցում էր փոխնախարար Զոհրապ Մնացականյանը:
