Եթե մինչև Ռամիլ Սաֆարովի արտահանձնումը Ադրբեջանի քաղաքացիներն էին արդարացնում նրա կատարած հանցագործությունը, ապա այժմ Ադրբեջան պետությունն է արդարացնում սպանությունը՝ այսօր հրավիրված ասուլիսում հայտարարեց «Կովկաս» ինստիտուտի տնօրեն Ալեքսանդր Իսկանդարյանը:
Նա շեշտեց, որ հենց այդ պետության հետ են առաջարկում փոխզիջումների գնալ, հենց այդ պետությանն են առաջարկում հանձնել Ղարաբաղը: Նա ընդգծեց, որ այժմ հայ դիվանագետները պետք է կարողանան ճիշտ գործել և ստեղծված իրավիճակը ծառայեցնել Ղարաբաղյան հակամարտության կարգավորմանը: Թեև բանակցային գործընթացը շատ վատ վիճակում է և հույս չկա, որ այն մի քիչ տեղից կշարժվի:
Պատասխանելով «Առաջին լրատվական»-ի հարցին՝ միջազգային հանրությունը ճնշում կգործադրի՞ Հունգարիայի վրա, Իսկանդարյանը պատասխանեց՝ ոչ, սակայն կլինեն դատապարտումներ և արդեն երկու պետություն՝ Հայաստանը և ԱՄՆ-ն, դատապարտել են Հունգարիայի արարքը. «Որ դա կարող էր տեղի ունենալ` ակնհայտ է: Հայաստանի իշխանությունները կարո՞ղ էին դա կանխել՝ դժվար է ասել: Ես չգիտեմ, թե ինչ մեխանիզմներ են գործում Հունգարիայում, և ինչքանով Հայաստանը կարող էր ազդել դրանց վրա»,- ասաց Իսկանդարյանը` հավելելով, որ այստեղ իր դերն է ունեցել կոռուպցիան, քանի որ Հունգարիան կարող էր իմանալ, թե ինչ ռեակցիա կլինի Հայաստանի կողմից, եթե Սաֆարովին հանձնի Ադրբեջանին, բայց հունգարացիները գերադասեցին դա անել:
Ըստ Իսկանդարյանի՝ տեղի ունեցածը ՀՀ դիվանագիտության պարտություն չէ: Հունգարիան արդեն Եվրամիության համար խնդրահարույց երկիր է: Իսկանդարյանի խոսքով՝ Հայաստանի կողմից արժանի քայլերը հասկանալի և բնական են, այդ ռեակցիան ուղղված էր Հունգարիային, սակայն այժմ պետք է աշխատել ոչ թե դեպի Հունգարիա, այլ դեպի Մինսկի խումբը և գերտերություններ:
