Չինաստանի կենտրոնում գտնվող Չունցինի մի բնակիչ առաքման ծառայությամբ ինքն իրեն է ուղարկել: Հու Սեն անունով երիտասարդը որոշել է այս կերպ անակնկալ մատուցել իր սիրելիին` Լի Վանին:
Հու Սենն իրեն փաթեթավորել է մեծ ստվարաթղթե արկղի մեջ և էքսպրես-փոստի ծառայությանը խնդրել է փաթեթն իր ընկերուհու գրասենյակ առաքել: Սակայն փոստում ինչ-որ բան շփոթել են և 30 րոպեի փոխարեն առաքումը տևել է 3 ժամ,- փոխանցում է Lenta.ru-ն:
Մինչև չինացուն հասցրել են նշված հասցեն` նա արդեն իրեն վատ է զգացել, քանի որ թթվածինը չի հերիքել:
Արկղից դուրս գալուց հետո Հու Սենը դիմել է բժիշկների օգնությանը: Նա նշել է, որ փորձել է արկղում եղած ժամանակ դրա վրա անցք բացել, սակայն ստվարաթուղթը շատ ամուր է եղել, բացի դրանից` նա չի ուզեցել փչացնել անակնկալը:
Առաքման ծառայությունում ասել են, որ եթե իրենք իմանային երիտասարդի մտադրության մասին, կհրաժարվեին պատվերից:
Թե ինչպես է Լի Վանն արձագանքել ընկերոջ արարքին` չի հաղորդվում:
