Կոտայքի մարզի Աբովյան քաղաքում սեպտեմբերի 23-ին նախատեսված ՏԻՄ ընտրություններում իրեն մրցակից կարծես թե չունի գործող քաղաքապետ, ԲՀԿ-ական Կարապետ Գուլոյանը՝ ԲՀԿ առաջնորդ, հայտնի «բարերար» Գագիկ Ծառուկյանի փեսան: Առաջադրված թեկնածուներից երկուսն արդեն ինքնաբացարկ են հայտնել և դաշտում թողել են միայն անկուսակցական Արտաշես Մեհրաբյանին:
Այսինքն՝ 100%+1 կարելի է ասել, որ քաղաքը առաջիկա 4 տարիներին կրկին հանձնելու են Գուլոյանի բարեհաճությանը:
Մինչդեռ, ոչ վաղ անցյալում Վերահսկիչ պալատը մի քանի տասնյակ միլիոն դրամի խախտումներ էր հայտնաբերել Աբովյանի քաղաքապետարանի` 2009-2011թթ. գործունեության ուսումնասիրման արդյունքում:
Մասնավորապես, օբյեկտների շինարարության և հիմնանորոգման ծրագրերի իրականացման համար ծախսերի ընդհանուր գումարը նշված ժամանակաշրջանի համար կազմել է 1 մլրդ 269 մլն 571.31 հզ. դրամ: Ընտրանքային կարգով ստուգվել է թվով 6 օբյեկտ, ստուգված գումարը` 187 մլն 481.87 հզ. դրամ:
Ստուգման արդյունքում արձանագրվել է 26 մլն 131.6 հզ. դրամի խախտում: Էլ չենք խոսում շինարարության որակի մասին, որն ըստ ՎՊ հաշվետվության, պարզապես անորակ են:
Անորակ է իրականացվել նաև քաղաքի ասֆալտապատումը: Համայնքի գույքահարկի բազաների ուսումնասիրման արդյունքում հայտնաբերվել են բազայում չընդգրկված մի շարք կազմակերպություններին պատկանող տարածքներ և շենք-շինություններ:
Կազմակերպությունները, խախտելով «Գույքահարկի մասին» ՀՀ օրենքի 9-րդ հոդվածի 1-ին և 2-րդ կետի պահանջները, քաղաքապետարան ընդհանրապես չեն ներկայացրել եռամսյակային հաշվետվություններ և համայնքի գույքահարկի բազայից դուրս են մնացել, որոնց համայնքի բյուջե վճարելիք գումարը տույժերի հետ միասին 19.12.2011թ. դրությամբ կազմել է 6 մլն 362.4 հզ. դրամ: Համայնքում հաշվառումից դուրս մնացած և առանց թույլտվության աշխատող տեղական տուրք վճարողների և արտաքին գովազդի 145.5քմ վահանակների գովազդատուների կողմից համայնքի բյուջե չվճարված տեղական տուրքի գումարը կազմել է 2 մլն 686.5 հզ. դրամ։
Սա դեռ միայն հայտնաբերվածի մասով: Իսկ չհայտնաբերվա՞ծ միլիոնները: Բնական է, որ այս ամենն առանց քաղաքապետի, որը տվյալ դեպքում վերածվում է «քաղաք նայողի», իմացության, հովանավորչության ու մասնակցության չէր կարող տեղի ունենալ: