Սպիտակ տունը հայտարարել է, որ ուշադրությամբ ուսումնասիրում է Իրանի միջուկային ծրագրի վերաբերյալ ՄԱԿ-ի նոր զեկույցը: Սպիտակ տան ներկայացուցիչ Ջեյ Քարնիի խոսքով` Իրանը դեռ հնարավորություն ունի իր միջուկային ծրագրի շուրջ ստեղծված խնդիրները հարթել դիվանագիտական ճանապարհով, սակայն այդ հնարավորությունը հավերժ չէ: Այս մասին հաղորդում է «Ազատություն» ռադիոկայանի ռուսական ծառայությունը:
Փաստաթղթում, որը պատրաստել է Ատոմային էներգիայի միջազգային գործակալությունը, նշվում է, որ Իրանը կրկնապատկել է ուրանի հարստացման համար ցենտրիֆուգների թիվը իր ստորգետնյա Ֆորդոու միջուկային կենտրոնում: Հաղորդվում է նաև, որ Թեհրանը ընդլայնել է միջուկային նյութերի պաշարները:
ՄԱԳԱՏԷ-ն նշում է, որ Իրանի ղեկավարության հետ միջուկային հարցի շուրջ այս տարի կայացած բանակցությունները ավարտվել են առանց որոշակի արդյունքների:
Արևմուտքի երկրները Իրանին կասկածում են միջուկային զենք ստեղծելու մտադրության մեջ: Իսլամական Հանրապետությունը, սակայն, բազմիցս հայտարարել է, որ իր միջուկային ծրագիրը կրում է բացառապես խաղաղ բնույթ:
