ՀՅԴ Հայ դատի եւ քաղաքական հարցերով գրասենյակի պատասխանատու Կիրո Մանոյանի գնահատմամբ, Ալիեւ-Սարգսյան-Մեդվեդեւ աստրախանյան հանդիպման հիմնական նպատակը մթնոլորտը մի քիչ հանդարտեցնելն էր, որն սկսել էր շիկանալ: Ըստ Մանոյանի` մթնոլորտը վերջին շրջանում շիկացել էր, մասնավորապես, Ալիեւի հայտարարությունների, դրանց` Սերժ Սարգսյանի որոշ պատասխանների, ինչպես նաև հրադադարի ռեժիմի խախտման հաճախակիացած դեպքերի պատճառով: Սակայն Մանոյանի կարծիքով, այլ բան վերոհիշյալ հանդիպումը չտվեց, եւ դեկտեմբերին Աստանայում կայանալիք ԵԱՀԿ գագաթնաժողովից ակնկալիքներ ունենալու հիմք չկա: «Լավագույն դեպքում տարեվերջին ԵԱՀԿ-ն կարող է ԼՂ խնդրի հետ կապված որեւէ մակարդակի հայտարարությամբ հանդես գալ՝ վերահաստատելով հակամարտության կարգավորման սկզբունքները»: Անդրադառնալով ռազմագերիների փոխանակման վերաբերյալ ձեռք բերված համաձայնությանը` Կիրո Մանոյանը նշեց, որ Ադրբեջանը, թերեւս, կկատարի իր այդ խոստումը, թեկուզ հենց նրա համար, որ ցույց տա, որ գործընթացում առաջընթաց կա: