Գյումրիի զբաղվածության մարզային կենտրոնում գրանցված գործազուրկների թիվը 9222 է: Գործազուրկների թիվը նախորդ տարվա նույն ժամանակահատվածի համեմատությամբ նվազել է 13.1 տոկոսով: Այս մասին «Առաջին լրատվական»-ի թղթակցի հետ զրույցում նշեց Զբաղվածության մարզային կենտրոնի տնօրեն Ամալյա Ադամյանը:
«Գործազուրկների թվաքանակում մեծ թիվ են կազմում ինժեներները, բուժքույրերը, հաշվապահները, տնտեսագետները, մանկավարժները, տեխնիկներն ու վարորդները: Աշխատանք փնտրողների մեջ մեծ թիվ են կազմում նաև աշխատաշուկայում անմրցունակ անձինք, հատկապես երեք տարուց ավելի գործազուրկի կարգավիճակում գտնվողները` 1859 մարդ կամ 24 տոկոս, և հաշմանդամները`343 մարդ կամ չզբաղվածների 3,7 տոկոսը»,- նշեց Ամալյա Ադամյանը:
Հավելենք, որ Գյումրիում վաղը նախատեսված է անցկացնել աշխատանքի տոնավաճառ, որին մասնակցելու հայտ են ներկայացրել 32 գործատուներ: Ինչպես «Առաջին լրատվական»-ին տեղեկացրեց Զբաղվածության մարզային կենտրոնի տնօրենը, նախատեսվում է ներկայացնել 148 առկա եւ 179 կանխատեսվող թափուր աշխատատեղ: Ի դեպ, Գյումրիում աշխատանք փնտրողների մեջ մեծ թիվ են կազմում հատկապես կանայք:
