Պրիմորյեի և Խաբարովսկի երկրամասերում, ինչպես նաև Հրեական ինքնավար և Ամուրի մարզերում կարող են արտակարգ իրավիճակներ գրանցվել` կապված «Բոլավեն» թայֆունի հետ: Այս մասին հաղորդում է ՌԴ ԱԻՆ հեռավորարևելյան տարածաշրջանային կենտրոնը:
«Բոլավեն» թայֆունը ձևավորվել է Խաղաղ օվկիանոսի հարավային լայնություններում: Այն արդեն հասել է Ճապոնիայի հարավ: Շաբաթ օրը էպիկենտրոնում քամու ուժգնությունը կազմել է 70 մետր/վայրկյան, ալիքների բարձրությունը հասել է 10 մետրի: Վերջին անգամ նման ցուցանիշ գրանցվել է 1956 թվականին: ՌԴ օդերևութաբանական ծառայությունները ակտիվորեն մոնիտորինգի են ենթարկում թայֆունի տեղաշարժը, որը ուղղվում է դեպի հյուսիս:
Կանխատեսումների համաձայն` օգոստոսի 29-ի գիշերը ՌԴ նշված տարածքներում սպասվում են ուժեղ քամիներ (25–30 մետր/վայրկյան արագությամբ) և տեղատարափ անձրևներ, սպասվում է գետերի ջրերի մակարդակի բարձրացումներ (մինչև 1 մետր):
Նախազգուշացում է արվել կոմունալ համակարգերում և տրանսպորտի աշխատանքում հնարավոր խափանումների մասին:
