Ընթերցելով Վանաձորի քաղաքապետի թեկնածու, գործող քաղաքապետ Սամվել Դարբինյանի նախընտրական ծրագրի կետերը՝ հնարավոր չէ անտարբեր մնալ:
«Յուրաքանչյուր մարդ աշխատելով որևէ ոլորտում, ձեռք բերելով փորձ՝ պրոֆեսիոնալ է դառնում իր գործում». այս տողերը Սամվել Դարբինյանի նախընտրական ծրագրի հենց առաջին էջում են զետեղված: Փաստորեն, «պրոֆեսիոնալ» քաղաքապետը որպես նորից վերընտրվելու նախապայման ու հիմք ծառայեցնում է այն փաստը, որ արդեն 13 տարի՝ սկսած 1999 թվականից, հենց ինքն է ղեկավարում քաղաքը:
Շարունակելով նախընտրական ծրագրի ընթերցումը՝ հետաքրքիր տողեր կարելի է կարդալ Սամվել Դարբինյանի կատարած աշխատանքների մասին: Օրինակ՝ թե ինչպես են տնակներում տարիներ շարունակ բնակվող մարդիկ բնակարանների գնման վկայագրեր ստացել, կամ թե ինչպես է այս տարիների ընթացքում կատարվել շուրջ 103 կմ փողոցների երթևեկելի մասերի, անցումների ու խաչմերուկների նշագծում, կամ՝ 176 փողոցների, մայթերի ու հրապարակների կապիտալ և մասնակի նորոգում: Նշվածներից յուրաքանչյուրը կատարվել է կառավարության ֆինանսական օժանդակությամբ ու միջոցներով, որոշակի ծրագրերով:
Բացի այդ, կան դրույթներ էլ, որոնք կառավարության ֆինանսական օգնության ու համայնքի համատեղ միջոցների հաշվին են կատարվել: Օրինակ՝ հիմնանորոգված 98 շենքերի տանիքներից 47-ը, 39 բազմաբնակարան շենքերի վերելակներից 11-ը և բարեկարգված բոլոր 18 շենքերի բակերը ՀՀ կառավարության միջոցներով են իրականացվել: Թվարկվածներից բոլորը քաղաքապետի նախընտրական ծրագրում են ներառված՝ որպես բնակարանային տնտեսությունների ոլորտում կատարված աշխատանքներ:
Իսկ օրերս՝ լրագրողների հետ հանդիպման ժամանակ, գործող քաղաքապետը խոսեց նաև այն մասին, որ 1999-ից, երբ ինքն առաջին անգամ ընտրվեց որպես համայնքի ղեկավար, մինչ օրս փոխվել են դպրոցների ու նախակրթարանների կարգավիճակները՝ տնակայինից վերածվելով քարե շինությունների: Տպավորությունն այնպիսին է, որ եթե Սամվել Դարբինյանի փոխարեն մեկ ուրիշն ընտրվեր, Վանաձորի դպրոցներն ու նախակրթարանները մինչ օրս կգործեին տնակային պայմաններում, փայտի ու ածուխի վառարաններով ու կաթող տանիքներով:
Անցում կատարենք Վանաձորի քաղաքապետի՝ նախընտրական բուկլետում որպես ուղղակի խոսք գրված տողերից մեկին. «Ձգտել եմ, որ Վանաձորը ներկա պայմաններում ապրի ու շնչի ժամանակակից քաղաքին բնորոշ կյանքով»:
Նշենք, որ մինչ օրս Վանաձորում չկան նորմալ ժամանցի վայրեր, գործող բոլոր զբոսայգիներից փոքր-ինչ տարբերվում է Երկաթուղայինների այգին, որտեղ վերջապես տեղադրվել են մի քանի մանկական կարուսելներ, գործում են մի քանի սրճարաններ, սակայն տարածքի մաքրությունն այնքան չհամապատասխանող է նորմերին, որ քաղաքի լավագույն զբոսայգին, մեղմ ասած, չի գրավում բնակիչների մեծ մասին: Մյուս բոլոր այգիներում չկան անգամ աղբի համար նախատեսված արկղեր, նստարանները գրեթե բացակայում են, եղածներն էլ կամ ջարդված են, կամ մասամբ պոկված: Իսկ քաղաքի գլխավոր՝ Հայքի հրապարակի շատրվանները շաբաթվա մեծ մասը չեն գործում, թեև քաղաքապետն իր ասուլիսի ժամանակ, բարձրացված այս հարցին ի պատասխան, նշեց, որ ինքն անձամբ ամեն օր հրապարակում է, շատրվանները միշտ գործում են, անջատվում են միայն մաքրման օրերին՝ շաբաթական մեկ օր: Հարկ է նշել, որ հենց լրագրողների հետ հանդիպման օրը կենտրոնական հրապարակի շատրվանները չէին գործում:
Փաստորեն, «Յուրաքանչյուր մարդ աշխատելով որևէ ոլորտում, ձեռք բերելով փորձ՝ պրոֆեսիոնալ է դառնում իր գործում» տողերն ու նույն էջում գրված՝ «Շարունակենք մեր գործը և անենք ավելին» կոչը ոչինչ չեն ասում վանաձորցիներին:
Իսկ նույն այդ վանաձորցիները գրեթե վստահ են, որ այս ընտրությունները ոչնչով չեն տարբերվի նախորդ չորսից, ու կընտրվի նորից գործող «պրոֆեսիոնալ» քաղաքապետը:
