Վանաձորի քաղաքապետի թեկնածու Տարոն Ապրեսյանի նախընտրական շտաբը հայտարարություն է տարածել, որը ներկայացնում ենք ստորև.
Ես` Վանաձորի քաղաքապետի թեկնածու Տարոն Ապրեսյանս, հանդես եմ գալիս հայտարարությամբ առ այն, որ ԿԸՀ-ի որոշմամբ թիվ 30 ԸԸՀ-ի անդամ է նշանակվել, իսկ այնուհետև ԸԸՀ-ի նախագահ է ընտրվել Տիգրան Արբակի Պապանյանը, ով հանդիսանում է Վանաձոր քաղաքի քաղաքապետարանի ճարտարապետության և քաղաքաշինության բաժնի պետ: Հարկ եմ համարում նաև նշել, որ պարոն Պապանյանը Վանաձորի քաղաքապետ, համայնքի ղեկավարի թեկնածու Սամվել Դարբինյանի հետ գտնվում է բարեկամական կապի մեջ (քրոջ ամուսինն է):
Մատնանշելով այս փաստը և ղեկավարվելով ՀՀ Ընտրական օրենսգրքի 37-րդ հոդվածի 1-ին մասով` մեջբերում եմ. «Ընտրական հանձնաժողովի անդամն ընտրական հանձնաժողովում գործում է անկախ և չի ներկայացնում իրեն նշանակողին» և 46-րդ հոդվածի 1-ին մասի 1)-ին կետով.«Ընտրական հանաձնաժողովի որոշումները, գործողությունները կամ անգործությունը կարող է բողաքարկել յուրաքանչյուր ոք, եթե գտնում է, որ խախտվել կամ կարող է խախտվել իր սուբյեկտիվ ընտրական իրավունքը»:
Գտնում եմ, որ պարոն Պապանյանի նախընտրական գործունեությունը, որպես ԸԸՀ-ի նախագահ, կարող է ազդել ընտրությունների անկողմնակալ և անաչառ ընթացքի վրա` կասկածի տակ դնելով ընտրությունների արդյունքները:
Ելնելով վերը նշվածից` դիմել եմ ԿԸՀ նախագահ Տիգրան Մուկուչյանին վերանայել վերջինիս նշանակման որոշումը և միջոցներ ձեռնարկել խնդրի լուծման ուղղությամբ:
