Ուկրաինայի Արվեստի ազգային թանգարանում արտասովոր ցուցահանդես է բացվել: «Քնած գեղեցկուհի» ցուցահանդեսի ցուցանմուշները իրական գեղեցկուհիներն են, որոնք գեղեցիկ դիմահարդարված քնած են, սպասում են այն պահին, թե երբ արքայազնը համբույրով կարթնացնի իրենց, ինչպես Շառլ Պերոյի հայտնի հեքիաթում: Այս մասին հայտնում է Oddity Central-ը:
Ամուսնանալ ցանկացող երիտասարդ աղջիկները ընտրվել են դեռևս անցած ամիս՝ դառնալու կանադաբնակ ուկրաինացի նկարիչ Տարաս Պոլատաիկոյի արվեստի ինստալյացիայի մի մասը: Աղջիկներից յուրաքանչյուրը ցուցահանդեսում կանցկացնի 3 օր: Ի տարբերություն հեքիաթի՝ աղջիկները ոչ կախարդված են, ոչ էլ թունավորված:
Ըստ կազմակերպիչների հետ կնքած համաձայնագրի՝աղջիկները, ովքեր համբույրի ժամանակ կբացեն իրենց աչքերը, ստիպված կլինեն ամուսնանալ համբուրողի հետ: Համաձայնագիր է կնքվում նաև այցելուների հետ: Նրանք, ովքեր համբույրով կստիպեն քնած գեղեցկուհիներին բացել աչքերը, ստիպված կլինեն ամուսնանալ նրանց հետ:
Աղջիկները կարող են իրենց աչքերը չբացել այնքան ժամանակ, մինչև չզգան, որ համբույրն անկեղծ է:
Ի դեպ, ցուցահանդես են այցելում աշխարհի տարբեր ծայրերից: Արտասովոր ցուցադրությունը կտևի մինչև սեպտեմբերի 9-ը:
