Ինչպես երեքշաբթի օրը գրել է չինական կայքերից մեկը, Պեկինի մի բնակիչ մահացել է ինտերնետ-սրճարանում այն բանից հետո, երբ համարյա մեկ ամիս շարունակ անց է կացրել համաշխարհային սարդոստայնում:
33-ամյա գործազուրկ տղամարդը մահացել է երկուշաբթի օրը: Ինչպես պատմել են սրճարանի աշխատակիցները, վերջին 27 օրերի ընթացքում տղամարդը չի լքել սրճարանը: Այս ամբողջ ժամանակահատվածում նա կերել է արագ պատրաստվող արիշտա:
«Անգամ ամանորյա տոները (Պեկինի բնակիչները նշել են դրանք լուսնային օրացույցով փետրվարի 3-8-ը) նա անց է կացրել համակարգչի դիմաց», – գրում է կայքը: Մահվան պատճառները չեն ճշտվել:
Ինչպես կայքին հայտնել են սրճարանի այցելուները, նրանք ամեն օր այդ մարդուն տեսել են սրճարանում, որտեղ, նրանց խոսքերով, տղամարդը հա՛մ սնվում էր, հա՛մ էլ քնում:
Կայքի լրագրողների տեղեկություններով, ինտերնետ-սրճարանը, որն անօրինական է աշխատել, փակել են ստուգումների համար: Համակարգչային տեխնիկան առգրավվել է:
Վերջին տվյալներով, ՉԺՀ-ում ինտերնետից օգտվողների թիվը հասնում է 475 միլիոնի: Միևնույն ժամանակ, ըստ վիճակագրության, Չինաստանի երիտասարդ օգտատերերի 14%-ը տառապում է ինտերնետ կախվածությունից:
