Փետրվարի 21-ի կեսօրից հետո դժվարանցանելի է դարձել Երևան-Մեղրի միջպետական ճանապարհի Շուռնուխ-Կապան հատվածը։ Ժամը 13։30-ի դրությամբ, կանգնած է մնացել 10 մեքենա։ Դրանց թվում է նաև երեկ Սյունիք ժամանած արտակարգ իրավիճակների նախարար Արմեն Երիցյանին ուղեկցող մեքենաներից մեկը: Բարեբախտաբար, նախարարին հաջողվել էր շուտ անցնել։ Կանգնած մեքենաները և՛ մարդատար են, և՛ բեռնատար, նաև Իրանի Իսլամական Հանրապետության բեռնատարներ կան։ Ըստ Սյունիքի փրկարար ծառայության պետ Արթուր Հարությունյանի՝ դրանք այն մեքենաներն են, որոնք կապրոնե անվանադողերով են։ «Իսկ ձմեռային անվադողեր ունեցող մեքենաները կարողանում են հաղթահարել մոտ 1 կիլոմետրանոց դժվարանցանելի այս հատվածը»,- ասաց Ա. Հարությունյանը: Միջպետական ճանապարհի այդ հատվածը սպասարկող «Ոսմար» ընկերության աշխատակիցները մաքրում են ճանապարհը, ինչպես նաև փրկարարների հետ միջոցներ են ձեռնարկում կանգնած մեքենաները դժվարանցանելի հատվածից դուրս բերելու համար: