Օգոստոսի 19-ին Ռուսաստանում սկսել է հեռարձակվել առաջին մուսուլմանական հեռուստաալիքը` Аль-РТВ-ը: Հեռուստաալիքն առայժմ հեռարձակվում է ռուսական 8 տարածաշրջաններում` Բաշկորտոստանում, Թաթարստանում և Հյուսիսային Կովկասի 6 հանրապետություններում: Այս մասին հայտնում է «Բաշինֆորմ»-ը:
Аль-РТВ հեռուստաալիքը ստեղծվել է մուսուլմանական խոշորագույն կազմակերպությունների նախաձեռնությամբ` նպաստելու համար մուսուլմանական հոգևոր և բարոյական արժեքների տարածմանը, բացի դրանից՝ այն կպատմի Ռուսաստանի այլ կրոնների և հավատքների մասին: Ալիքը առաջին հերթին կենտրոնացած է երիտասարդ լսարանի վրա: Հեռարձակումը շուրջօրյա է:
Հեռարձակումը համապատասխանեցված էր Ուրազ-Բայրամի տոնի հետ, որով մահմեդականները նշում են Ռամադանի ամսի ավարտը:
Հեռուստաալիքի գլխավոր խմբագիրը Եվրասիական Ակադեմիայի հեռուստատեսության և ռադիոյի փոխնախագահ Ռուստամ Արիֆուջանովն է: Հեռուստաալիքը ղեկավարում է հասարակական խորհուրդը, որի կազմում են Ռուսաստանի բոլոր խոշոր մուսուլմանական կազմակերպությունների ներկայացուցիչները:
Հեռուստաալիքը կգործի մասնավոր նվիրատվություններով և պետական հատկացումներով: