«Ժառանգությունը» կոչ է անում ԱԺ արտահերթ նիստ հրավիրել փետրվարի 24-ին:
Այսօր «Ժառանգություն» ընդդիմադիր խորհրդարանական խմբակցությունը պաշտոնական նամակով դիմել է Ազգային ժողովի նախագահ Հովիկ Աբրահամյանին, փոխնախագահ Սամվել Բալասանյանին, ԱԺ ՙՀՀԿ՚, ՙԲարգավաճ Հայաստան՚, ՙՕրինաց երկիր՚ և ՙՀՅԴ՚ խմբակցությունների ղեկավարներ Գալուստ Սահակյանին, Գագիկ Ծառուկյանին, Հեղինե Բիշարյանին և Վահան Հովհաննիսյանին` առաջարկելով ս.թ. փետրվարի 24-ին` հինգշաբթի օրը, արտահերթ նիստ հրավիրել` ՙԺառանգություն՚ խմբակցության պատգամավորների և ԱԺ փոխնախագահ Սամվել Բալասանյանին ներկայացրած ՙՀայաստանի Հանրապետության մաքսային օրենսգրքում լրացում կատարելու մասին՚ օրենքի երկու նախագծերի քննարկման օրակարգով:
Նամակի ամբողջական տեքստը ներկայացնում ենք ստորև.
ՙ Հարգելի տիկին և պարոնայք,
Քաջատեղյակ եք, որ Ազգային ժողովում այս պահին շրջանառության մեջ են դրված ՙՀայաստանի Հանրապետության մաքսային օրենսգրքում լրացում կատարելու մասին՚ Հայաստանի Հանրապետության օրենքի երկու նախագծեր. մեկը` հեղինակված ԱԺ փոխնախագահ Սամվել Բալասանյանի (Պ-1086-10.02.2011-ՏՀ-010/0), մյուսը` ՙԺառանգության՚ պատգամավորներ Րաֆֆի Հովհաննիսյանի, Լարիսա Ալավերդյանի, Արմեն Մարտիրոսյանի, Անահիտ Բախշյանի, Զարուհի Փոստանջյանի և Ստյոպա Սաֆարյանի (Պ-1089-17.02.2011-ՏՀ-010/0) կողմից:
Երկու նախագծերը միմյանց չեն հակասում, ավելին` լրացնում են մեկը մյուսին, և նպատակ ունեն կարգավորել 2010 թվականի դեկտեմբերի 22-ի ՙՀայաստանի Հանրապետության մաքսային օրենսգրքում լրացումներ և փոփոխություններ կատարելու մասին՚ Հայաստանի Հանրապետության օրենքի 5-րդ հոդվածում կատարված փոփոխության արդյունքում ՙանհապաղ՚ մաքսազերծման պահանջի պատճառով Հայաստանի Հանրապետություն ժամանակավոր ներմուծված ավտոմեքենաների հազարավոր սեփականատերերի համար հարուցված խնդիրները:
Ծագած խնդիների օբյեկտիվ և մարդասիրական լուծումը գտնվում է հետևյալում. այդ բազմահազար անձանց գոնե երկու տարի ժամանակ տրամադրել, ինչպես նախատեսում է Ս. Բալասանյանի ներկայացրած նախագիծը, և նման ավտոմեքենաների ժամանակավոր ներմուծման համար ժամանակավորապես վերականգնել ՀՀ Մաքսային օրենսգրքի նախկին պայմանակարգը, ինչպես նախատեսում է ՙԺառանգության՚ պատգամավորների հեղինակած օրինագիծը, ինչպես նաև` այլ փոփոխությունների ու լրացումների միջոցով հստակեցնել, պարզեցնել ու ռացիոնալացնել մաքսազերծման ընթացակարգը, դրույքաչափերը, որպեսզի ավտոմեքենա ներմուծող մեր հայրենակիցները չխուսափեն մաքսազերծումից: Այդ ընթացքում հնարավոր կլինի հարցը կարգավորել առանց ցնցումների, փակուղուց հանելով բազմաթիվ անձանց, ովքեր իրականում հայտնվել են անելանելի դրության մեջ և այլ հնարավորություն չունենալով` նման կերպ են կարողանում հայթայթել նվազագույն ֆինանսական միջոցներ` իրենց ընտանիքների գոյատևման համար:
Հաշվի առնելով ժամանակի գործոնը, քանի որ ուժի մեջ մտած փոփոխությունների արդյունքում հազարավոր մարդիկ հայտնվել են ծանրագույն վիճակում, և արդեն լրանում է օրենքով սահմանված 15-օրյա ժամկետը, առաջարկում ենք ձեզ ս.թ. փետրվարի 24-ին` հինգշաբթի, հրավիրել արտահերթ նիստ` երկու նախագծերի քննարկման օրակարգով` միավորելով և ընդունելով դրանք: Խնդրում ենք Ձեր պատասխանի մասին տեղյակ պահել ՙԺառանգություն՚ խմբակցությանը, որպեսզի Ձեզ փոխանցվի ԱԺ արտահերթ նիստ հրավիրելու կապակցությամբ աշխատակազմից վերցված ձևաթուղթը` այն ստորագրելու համար՚: