Զարուհի Փոստանջյանի եղբոր փաստաբան Հայկ Ալումյանը, լրագրողների հետ հանդիպման ժամանակ ներկայացնելով գործի մանրամասները, նշեց, որ ուրբաթ օրը Փոստանջյանի եղբորը զանգել է անծանոթ անձ և ասել, որ իրեն ստիպում են ցուցմունքներ տալ Տիգրան Փոստանջյանի դեմ, քանի որ ոմանք այդ միջոցով փորձում են հաշվեհարդար տեսնել նրա քրոջ հետ:
Ալումյանը նշեց, որ գլխավոր դատախազության հաղորդագրության մեջ, ամենաբիրտ ձևով խախտելով անմեղության կանխավարկածը, տեղադրված է հայտարարություն, թե Տիգրան Փոստանջյանը կատարել է հանցագործություն, և դա գլխավոր դատախազությունը համարում է հաստատված.
«Դրանով նրանք հաստատում են, թե Փոստանջյանը, հանդիսանալով հանրային ծառայող, ապօրինաբար պահանջել և ստացել է վարձատրություն ոմն քաղաքացուց: Ավելին՝ քրեական գործը հարուցվել է գոնե մի անգամ բացատրություն չվերցնելով այն անձից, ում վերաբերյալ հաղորդում է տրվել գլխավոր դատախազություն: Ստացվում է, որ եթե ցանկացած մեկը հաղորդում տա որևէ մեկի կողմից հանցագործություն կատարելու մասին, գլխավոր դատախազությունն արդեն իսկ իրեն իրավունք կվերապահի հայտարարելու, թե այդ անձը հանցագործ է»:
Զարուհի Փոստանջյանն էլ տեղեկացրեց, որ իրենք փորձել են ճշտել՝ ե՞րբ է հարուցվել քրեական գործը, սակայն պետական շահերի պաշտպանության վարչությունից նրանց պատասխանել են, թե դա նախաքննական գաղտնիք է:
Հայկ Ալումյանը նշեց, որ հայցադիմումն արդեն պատրաստ է. այսօր դիմելու են վարչական դատարան և պահանջելու են պարտավորեցնել հրապարակված տեղեկատվությունը հերքել և բռնագանձել վնասի փոխհատուցում:
«Թող իմանան գործը նախաձեռնողները, որ այս գործը հասնելու է Եվրոպական դատարան, եթե ներպետական ատյանները շարունակեն իրենց որդեգրած ոչ օրինական ձևը»,- եզրափակեց փաստաբանը:
