«Հայոց արծիվներ» հայրենասիրական հասարակական կազմակերպությունը շաբաթ օրը` փետրվարի 19-ին, տոնեց կազմավորման մեկ տարին, ՀՀ անկախության 20-ամյակը և Սերժ Սարգսյանի նախագահության երեք տարին: Մատենադարանի մոտ հանրահավաքից հետո խաղաղ երթն ավարտվեց Հանրապետության հրապարակում: Արծիվներն այստեղ քոչարի պարեցին: Նախօրեին «Հայոց արծիվներ»-ը բաժանել էր իր միամյակին նվիրված գրքույկը:
Հետաքրքիր է, որ գրքույկում «հայրենասիրական հասարակական կազմակերպություն»-ը որպես հապավում գրվել է հհկ: Այսինքն՝ տառային հապավումները գրվում են մեծատառով, սակայն այս դեպքում ՀՀԿ` կհասկացվեր Հայաստանի հանրապետական կուսակցություն: Գուցե հենց գլխավոր արծիվը` ՀՀ սպորտի և երիտասարդության հարցերի փոխնախարար, ՀՀԿ խորհրդի անդամ Խաչիկ Ասրյանը այդ նպատակով է կազմակերպությունը կոչել հայրենասիրական:
Ի դեպ, նախագահականին մոտ կանգնած աղբյուրները նշում են, որ շուտով Խ. Ասրյանին նոր պաշտոն է սպասվում: Ամենաշատը շրջանառվում է նրան Սյունիքի մարզպետի պաշտոնում նշանակելու լուրը:
