«Առաջին լրատվականն» արդեն տեղեկացրել էր այն մասին, որ մի շարք գործակալություններ, հղում անելով թուրքական դիվանագիտական աղբյուրներին, նշում են, թե հաջորդ ամիս Մոսկվայում կայանալու է հայ և թուրք դիվանագետների հանդիպում: Նշվում է, որ հանդիպման մասին պայմանավորվածություն ձեռք է բերվել վերջերս Թուրքիայի փոխարտգործնախարար Ֆիրուդին Սինիրլիօղլուի` ՌԴ փոխարտգործնախարար Գրիգորի Կարասինի հետ հանդիպման ժամանակ:
Նույն աղբյուրները տեղեկացրել են, որ թուրքական կողմին Հայաստանի հետ հարաբերությունների նորմալացման համար բավարար կլինի նույնիսկ «Ադրբեջանի գրավյալ որոշ տարածքների» ազատումը:
Այս փաստի առնչությամբ, վերջերս ՌԴ փոխարտգործնախարար Գրիգորի Կարասինը այցելել է Երևան և բանակցություններ ունեցել հայկական կողմի հետ: Նույն նպատակով Հայաստան է ժամանելու նաև ԱՄՆ պետքարտուղարի տեղակալ Ջեյմս Ստեյնբերգը:
«Առաջին լրատվակսնը» քիչ առաջ ՀՀ ԱԳՆ մամլո քարտուղարին խնդրեց պաշտոնապես մեկնաբանել վերոնշյալ տեղեկությունը: ՀՀ ԱԳՆ մամուլի և հասարակայնության հետ վարչության ղեկավար Տիգրան Բալայանը պատասխանեց.
«Հայ-թուրքական հարաբերությունների կարգավորման համար նոր բանակցությունների կարիք չկա` անկախ ձևաչափից: Կան ստորագրված արձանագրություններ, որոնք պետք է վավերացնել և իրականացնել առանց նախապայմանների: Սա է միջազգային հանրության և Հայաստանի դիրքորոշումը»: