Բրիտանական Financial Times թերթի փոխանցմամբ՝ սիրիական պատերազմը կարող է վատ հետևանքներ ունենալ Թուրքիայի համար. «Սիրիայի անկումն ի ցույց է դնում այն խոր ճեղքվածքները, որոնց վրա հենված է տարածաշրջանում Թուրքիայի ազդեցությունը:
Հետևանքները կարող են ամենավատը լինել ոչ միայն Թուրքիայի, այլև Արևմուտքի համար, ով կարիք ունի իսլամական աշխարհում կայուն դաշնակցի: Քրդերը դանդաղ, սակայն հաստատապես վերահսկողություն են հաստատում Սիրիայի հյուսիսարևելյան շրջանի վրա, և Անկարան սկսել է գիտակցել, որ իր համար ամենավատ տարբերակը՝ քրդական դաշնության ի հայտ գալը, դառնում է ակնհայտ:
Թուրքական ընտրանու համար դա սպառնում է պետության գոյությանը: Թուրքիայի տարածքում բնակվում է 13 միլիոն քուրդ: Իրաքյան Քրդստանի տարածքում և «ազատագրված» սիրիական շրջաններում քրդական պետության սաղմի ի հայտ գալը կարող է իրենում ներառել Թուրքիայի տարածքի մեծ կտորներ: Անկարային հատկապես մտահոգում է Սիրիայում «Ժողովրդավարական միասնություն» կուսակցության (PYD) ամրապնդումը, որը վերջին 30 տարիներին Թուրքիայի դեմ պատերազմ մղող «Քրդստանի աշխատավորական» կուսակցության (PKK) դաշնակիցն է:
PKK-ն լիովին օգտագործում է Սիրիայի քաղաքացիական պատերազմից բխած հնարավորությունները: Վերջին շաբաթներին կազմակերպվել են մի շարք խոշոր հարձակումներ Թուրքիայի հարավարևելյան հատվածում, ինչի հետևանքով զոհվել են տասնյակ թուրք զինծառայողներ: Ընդ որում, Անկարան ի զորու չէ ներազդել ստեղծված իրավիճակի վրա:
Հյուսիսային Իրաքի Քրդական ինքնավարության ղեկավար Մասուդ Բարզանիի հետ «մերձենալու» վարչապետ Ռեջեփ Էրդողանի փորձերը չպսակվեցին հաջողությամբ: Ի պատասխան Էրդողանի այդ խաղարկման՝ Բարզանին կազմակերպեց Ասադի դեմ պատերազմող քրդերի կոալիցիան, որի առաջատար ուժը դարձավ PYD-ը»: