Օզոնային շերտը քայքայումից փրկելը աշխարհի գրեթե բոլոր երկրների բնապահպանական միջոցառումների առանցքում է, և այս ուղղությամբ համընդհանուր քայլեր են ձեռնարկվում:
Դեռ 1985թ. միջազգային հանրությունն ընդունեց «Օզոնային շերտի պահպանման մասին» Վիեննայի կոնվենցիան, իսկ 1987թ. սեպտեմբերի 16-ին 36 երկիր ստորագրեցին «Օզոնային շերտը քայքայող նյութերի մասին» Մոնրեալի արձանագրությունը, համաձայն որի` մասնակից երկրները պայմանավորվեցին կրճատել, իսկ հետագայում ամբողջությամբ դադարեցնել օզոնաքայքայիչ նյութերի արտադրությունը:
Մի շարք փորձագետների գնահատմամբ, օզոնային շերտի պահպանման գործունեությունը թույլ է տվել կանխել մաշկի քաղցկեղի և կատարակտի հիվանդության հարյուր միլիոնավոր դեպքեր: Սակայն աշխարհում յուրաքանչյուր տարի բացահայտվում են 2-3 մլն մաշկի քաղցկեղի, 12-15 մլն կուրության դեպքեր:
Համաշխարհային առողջապահական կազմակերպության տվյալների համաձայն` այս դեպքերի 20 % կարող են առաջացած լինել վնասակար ուլտրամանուշակագույն ճառագայթման հետևանքով:
Հայաստանի Հանրապետությունը, կարևորելով միջազգային հանրության գործունեությունը՝ ուղղված օզոնային շերտի պահպանմանը, ևս վավերացրել է Վիեննայի կոնվենցիան և Մոնրեալի արձանագրությունը և արձանագրության բոլոր լրացումները և 2008թ.-ի սեպտեմբերից հանդիսանում է, այսպես կոչված, «օզոնային ընտանիքի» լիիրավ անդամ:
Հայաստանը միացել է նաև օզոնային շերտի մոնիտորինգի համաշխարհային ցանցին և ներկայացնում է տարածաշրջանի օզոնային շերտի վիճակի և ուլտրամանուշակագույն ճառագայթման տվյալները Համաշխարհային Կենտրոնին, որը գտնվում է Կանադայի Տորոնտո քաղաքում։
«Օզոնային շերտի վերականգնման համար անհրաժեշտ է լուրջ, շարունակական աշխատանք, որին յուրաքանչյուրս պետք է իրազեկ լինի: Մեզանից յուրաքանչյուրը պետք է գիտակցի, որ պահպանելով օզոնային շերտը` մենք պահպանում ենք մեր կյանքը Երկրի վրա»,- մեր հետ զրույցում նշեց բնապահպան Մարիա Գևորգյանը:
Մասնագետի խոսքով, մեր երկրում մարդիկ դեռ այնքան էլ տեղյակ չեն, թե ինչ է անհրաժեշտ ձեռնարկել ուլտրամանուշակագույն ճառագայթման բարձր մակարդակից պաշտպանվելու և ինչպես պետք է զերծ մնալ կամ կանխել օզոնային շերտի քայքայումը, այդ իսկ պատճառով անհրաժեշտություն կա հանրությանը տեղեկացնել օզոնային շերտը քայքայող բոլոր նյութերի մասին: