Թուրքական Doğan լրատվական գործակալության փոխանցմամբ՝ Թուրքիայի հիմնական ընդդիմադիր ուժի՝ Ժողովրդա-հանրապետական կուսակցության (ԺՀԿ) նախագահ Քեմալ Քըլըչդարօղլուն դատապարտել է քրդերի կողմից ԺՀԿ-ական պատգամավոր Հուսեին Այգունի առևանգումը:
Քըլըչդարօղլուն հայտարարել է, որ պատգամավորի առևանգման կապակցությամբ զանգահարել է նախագահ Աբդուլլահ Գյուլին և ընդգծել իրավիճակի լրջությունը: Նա հավելել է, որ նույն առիթով զանգահարել է Թուրքիայի Ազգային մեծ ժողովի (ԹԱՄԺ) նախագահ Ջեմիլ Չիչեքին և հայտնել, որ իրենք համակ ուշադրությամբ հետևում են իրադարձությունների ընթացքին:
ԺՀԿ-ի ներկայացուցիչ Հալուք Քոչն իր հերթին նշել է, որ Հուսեին Այգունն առևանգվել է երկրի արևելքում ընկած Թունջելի քաղաքի մոտ. «Առաջին անգամ է պատգամավոր առևանգվում ահաբեկչական կազմակերպության կողմից: Դա ցույց է տալիս, թե ինչպիսի մակարդակի է հասել ահաբեկչությունը»:
