ԱՄՆ-ն Սիրիայի փախստականներին 82 մլն դոլարի հումանիտար օգնություն է հատկացրել: Այս մասին հաղորդել է Պետդեպարտամենտը:
«ԱՄՆ-ն օգտագործում է ցանկացած հնարավորություն, ներառյալ դիվանագիտական անմիջական ջանքերը, երեխաներին, կանանց և տղամարդկանց օգնություն ցուցաբերելու համար: Այսօր Ստամբուլում պետքարտուղար Հիլարի Քլինթոնը հայտարարել է, որ ԱՄՆ-ն հավելյալ 5 միլիոն դոլար կտրամադրի հումանիտար օգնության գնման նպատակով: ԱՄՆ տրամադրած միջոցների ընդհանուր գումարը կազմում է մոտ 82 մլն դոլար»,- ասվում է Պետդեպարտամենտի հաղորդագրության մեջ:
ՄԱԿ-ի հաշվարկներով` Սիրիայում հումանիտար օգնության կարիք ունի մոտ 1,5 մլն մարդ: ԱՄՆ տրամադրած ֆինանսական միջոցներով կարիքավորների համար գնում են սննդամթերք, ջուր, դեղորայք, հագուստ, անձնական հիգիենայի պարագաներ և այլ ապրանքներ, որոնք անհրաժեշտ են հակամարտության հետևանքով տուժածներին:
Փախստականներին օգնությունը հասնում է Թուրքիայի, Հորդանանի և Լիբանանի աջակցությամբ:
