ԱԺ «Ժառանգություն» խմբակցության պատգամավոր Զարուհի Փոստանջյանը «Առաջին լրատվականի» հետ զրույցում նշեց, որ իր եղբոր` Տիգրան Փոստանջյանի նկատմամբ հարուցված քրեական գործը կարող է պատվիրված լինել հենց նախագահականից:
Հիշեցնենք, որ երեկ դատախազության կայքում հաղորդագրություն է տարածվել Տ.Փոստանջյանի նկատմամբ քրեական գործ հարուցելու վերաբերյալ: Սակայն դատախազության տարածած հաղորդագրությունում նշված չէ քրեական գործի հարուցման ամսաթիվը: Այդ հաղորդագրությունում նշված չէ նաև հաղորդագրության տեղադրման ժամը:
«Սկզբում, երբ եղբայրս ինձ ասաց, որ ինչ-որ մեկը զանգել է իրեն և տեղեկացրել, որ իմ գործունեության պատճառով իր վրա քրեական գործ են հարուցելու, ես կարծեցի, թե դրանում շահագրգռվածը Երևանի քաղաքապետն է և նրա ջանքերով են փորձում նման բան անել: Մի քանի ժամ անց արդեն իմացանք, որ քրեական գործի հարուցման վերաբերյալ հաղորդագրություն է տեղադրվել դատախազության կայքում, փորձեցինք ճշտել, թե առաջինը որ սայթում է տեղադրվել այն: Եթե չեմ սխալվում` aysor.am-ում է առաջինը տեղադրվել, այնտեղ տեղադրման ժամը նշված էր: Ամեն դեպքում չեմ բացառում, որ եղբորս նկատմամբ հարուցված քրեական գործը պատվիրվել է նախագահականից»,- ասաց Զ.Փոստանջյանը:
Նշենք, որ օրինակ` «Առաջին լրատվականը» այդ քրեական գործի հարուցման վերաբերյալ հաղորդագրություն դատախազությունից չի ստացել: Բացի այդ` այս պահի դրությամբ Տիգրան Փոստանջյանը ձերբակալված չէ: Նա նաև որևէ պաշտոնական տեղեկություն այն մասին, որ իր նկատմամբ քրեական գործ է հարուցվել, մինչ այս պահը չի ստացել:
Նշենք նաև, որ մեր տեղեկություններով, բազմաթիվ հասարակական ու իրավապաշտպան կազմակերպություններ պատրաստվում են հաղորդագրություն տարածել` իրենց աջակցությունը հայտնելով Զ.Փոստանջյանին և Տ.Փոստանջյանին: