Այսօր հայ անվանի բանաստեղծ Հովհաննես Թումանյանի ծննդյան օրն է: Արդեն երկու տարի է, ինչ այս օրը Հայաստանում նշվում է որպես Գրքի նվիրատվության օր: ՀՀ մշակույթի նախարարությունն այդ կապակցությամբ մի շարք միջոցառումներ է կազմակերպել մայրաքաղաքում:
Հայաստանի ազգային գրադարանը Գրքի նվիրատվության օրը նախատեսում է 20-30-ական միավոր գրականության նվիրատվություն համայնքային գրադարաններին:
Միջոցառումների շարք է նախապատրաստել նաև Խնկո Ապոր անվան ազգային մանկական գրադարանը: Փետրվարի 19-ին մանկական գրադարանում գրքի շնորհանդես կներկայացնի Հայաստանում Իրանի դեսպանատունը, տեղի կունենա Խ.Դաշտենցի «Ֆայտոն Ալեք»-ի շնորհանդեսն «Արևիկ» հրատարակչության կողմից:
Նույն օրը սպասվում է նաև «Հայ մատենագիրների թվանշանային գրադարան» կայքի շնորհանդեսը, կլինեն թումանյանական ընթերցանություններ, հանդիպումներ գրողների հետ, գրադարանի թատրոնի սաների ելույթներ, էքսկուրսիա, հեքիաթապատում, կինոդիտում, ձայնադարանում կոլեկտիվ ունկնդրումներ, նախատեսվում է նաև հոգեբանի հետ հանդիպում:
Օրվա խորհրդին հավատարիմ մնալով` կկատարվի գրքերի նվիրատվություն մանկական գրադարանին, կլոր սեղան` հրատարակիչների մասնակցությամբ և այլն:
