«Հայաստանի և Վրաստանի մոտ 30 հասարակական կազմակերպություններ իրենց կառավարություններից պահանջում են համապատասխան միջոցներ ձեռնարկել շրջակա միջավայրն ու բնակչությանը Թեղուտի հանքավայրի շահագործման բացասական հետևանքներից պաշտպանելու համար», ասված է կազմակերպությունների հայտարարության մեջ:
Новости-Грузия-ի փոխանցմամբ, Թեղուտի շահագործմամբ զբաղվող ընկերությունը չի նախատեսել հանքավայրի շահագործման դեպքում արտակարգ իրավիճակների արձագանքման նախագիծ, և լուրջ վթարների դեպքում հետևանքները կարող են շատ ծանր լինել երկու երկրների համար:
Բնապահպանների կարծիքով, ամենալուրջ սպառնալիքը թունավոր արտանետումներից պաշտպանող կառույցն է: Արտանետումների անկանխատեսելի արտահոսքի դեպքում անդառնալի վնաս կհասցվի ոչ միայն Հայաստանի, այլ նաև Վրաստանի տարածքին:
Կազմակերպությունները նշում են, որ Հայաստանի կառավարության կողմից հանքավայրի շահագործման արտոնագրի տրամադրումը Օրհուսյան կոնվենցիայի խախտում է:
Հայտարարությունը ստորագրողները կոչ են անում Հայաստանի կառավարությանը դադարեցնել նախագծի իրականացումը, մինչ խնդրի համակողմանի ուսումնասիրությունը միջազգային փորձի հիման վրա: