«Մենք այսօր ուզում ենք կարմիր քարտ ցույց տալ այն բոլոր սրիկայություններին, որոնք այսօր տեղի են ունենում երկուստեք բոլոր դաշտերում: Մի տեղ աբիժնիկներն են, մի տեղ հարստացման իշխանավորներն են բիրտ, եթե այսպես շարունակեն, իրենք կկորցնեն այն, ինչ որ ունեն»,- այսօր հայտարարեց ԺԿ ղեկավար Տիգրան Կարապետյանը` իր կուսակցության «երիտասարդական համաժողով» կոչված միջոցառման ժամանակ:
«Ես չեմ ընդունում մի կարգախոս, որ բոլորս պետք է միավորվենք իշխանության դեմ, այո, պետք է միավորվենք, բայց արդար ուժերով: Իշխանությունը կարող է ընդդիմությանը ակնարկել, օրինակ` երբ ընդդիմությունը հարց է տալիս գլխավոր դատախազին, ասելով, որ թրաֆիքինգ կա, ինքը ասում է` դա դուք եք սկսել, մենք վերացնում ենք հետևանքները»,- ասաց Տ. Կարապետյանը:
Հարցին, թե ովքեր են այն արդար ուժերը իր համար, որոնք կարող են իշխանության դեմ միավորվել, Տ. Կարապետյանը ասաց. «Որոնք որ չեն թալանել, ես անուններ չեմ կարող ասել, չէ, կարող եմ ասել, ես չեմ համարում դա կոռեկտ, բոլորս գիտենք: Եղել է իշխանություն, անընդմեջ, բան չի թողել, մենք ունեցել ենք 1500 գործարան Երևանում, ի գիտություն Ձեզ մենք ունեցել ենք ռոբոտների գործարան, ուր ա՞»:
Հարցին, թե ՀՅԴ-ն ու «Ժառանգությունը» իր համար արդա՞ր են, Կարապետյանը չպատասխանեց, իսկ հարցին, թե հնարավո՞ր է միավորվի ՀԱԿ-ի, «Ժառանգության» կամ ՀՅԴ հետ, ասաց` ոչ:
««Ժառանգությունը նախագահական խաղ է խաղում, նույնն էլ ՀԱԿ-ը, մենք կոչ ենք անում, որ լինեն խորհրդարանական արտահերթ և նախագահական ընտրություններ, իրենք ասում են` թող լինեն նախագահական, նոր խորհրդարանական, որովհետև ուզում են նախագահ նստեն»,- պարզաբանեց Տ.Կարապետյանը:
