Եվրոպական միությունը ուրբաթ օրը որոշում է կայացրել Հայաստանին հատկացնել 100 մլն եվրո օգնություն: Այս մասին հաղորդում է MSnews-ը: Օգնությունը հատկացվում է հետճգնաժամային վերականգնմանն աջակցելու ծրագրի շրջանակներում:
Այդ գումարից 65 մլն եվրոն կլինի վարկի տեսքով, իսկ 35-ը` դրամաշնորհների: Այս մասին տեղեկանում ենք Եվրահանձնաժողովի տարածած հայտարարությունից: Օգնությունը տրվում է Հայաստանի և Արժույթի միջազգային հիմնադրամի միջև հաստատված ծրագրի շրջանակներում:
Հայտարարության մեջ ասվում է, որ «Հայաստանը խնդրել էր միջազգային օգնություն այն բանից հետո, երբ 2009թ. նրա տնտեսությունն արձանագրել էր 14% անկում: Որպես օգնության տրամադրման նախապայման` ԱՄՀ-ն առաջարկել էր կրճատել պարտքերը, իրականացնել կենսաթոշակային և հարկային համակարգերի բարեփոխում, ինչպես նաև կատարելագործել պետական հաշիվների վերահսկողության համակարգը:
ԵՄ-ն 40 մլն եվրոն կտրամադրի այն ժամանակ, երբ ՀՀ խորհրդարանը հաստատի օգնության պայմանները, իսկ մնացյալ գումարը Հայաստանին կփոխանցվի մինչև 2011թ. վերջը: