ՀԱԿ բազմահազարանոց հանրահավաքի ավարտին այսօր Կոնգրեսի մաս կազմող կուսակցությունների առաջնորդների և Լ.Տեր–Պետրոսյանի գլխավորությամբ տեղի ունեցավ հզոր երթ, որն անցավ Մաշտոցի պողոտայով, Հանրապետության հրապարակով, Նալբանդյան փողոցով:
Երթի ընթացքում մասնակիցները վանկարկում էին «Լևոն՝ նախագահ», «Ազատություն», «Պայքար, պայքար մինչև վերջ»։ Կառավարության շենքը ամուր օղակով շրջապատել էին մահակներով զինված ոստիկանները։ Բազմահազարանոց երթի մասնակիցները փոխեցին երթուղին՝ ուղղվելով դեպի Նալբանդյան փողոց, Սախարավի հրապարակ։
Երթն ավարտվեց Հյուսիսային պողոտայում, որտեղ նախ ոստիկանության աշխատակիցները թեթև հրմշտոց հրահրեցին` ՀԱԿ-ի երիտասարդների մուտքը Հյուսիսային պողոտա խոչընդոտելով, սակայն քիչ անց միջադեպը հարթվեց: Այնուհետև ՀԱԿ երիտասարդները համառորեն պահանջում էին նստացույց անցկացնել։
«Այսօր իսկապես ժողովրդի կամքի արտահայտման հրաշալի օր է։ Սա ընդամենը սկիզբն է»,- նշեց Ա.Մանուկյանը։ Նա կոչ արեց երթի մասնակիցներին վստահել Կոնգրեսին, նրա առաջնորդ Լ.Տեր–Պետրոսյանին, ով Մանուկյանի խոսքով` «ճշգրիտ հաշվարկներով, ճիշտ պահին, ճիշտ տեղում ձեզ կհրահանգավորի»։
Իսկ ՀԱԿ համակարգող Լ.Զուրաբյանի գնահատմամբ, հանրահավաքը վկայեց այն մասին, որ հասարակությունը աստիճանաբար ոտքի է կանգնում, ինչպես` Եգիպտոսում։
Ի դեպ, նշենք նաև, որ ոստիկանության աշխատակիցները ավանդույթի համաձայն շղթայված «պահեցին» «Ազատության» հրապարակը:
