Կրթության և գիտության նախարարի որոշումը, համաձայն որի՝ Գյումրու պետական մանկավարժական քոլեջը վերամիավորվել է Գյումրու պետական մանկավարժական ինստիտուտին, առաջացրել է քոլեջի դասախոսական կազմի դժգոհությունը: Քոլեջը զրկվել է ընդունելության իրավունքից`մանկավարժական ուղղվածություն ունենալու պատճառով:
Քոլեջի դասախոսական կազմը դիմում-նամակ է հասցեագրել հանրապետության նախագահին, հայտնելով իր վրդովմունքը:
« 88 տարվա մանկավարժական կառույց, մեծ ավանդով, տվել է բազում սաներ, և այսօր իշխանությունները մատնանշում են, որ ամեն ինչ անում են արտագաղթը կանխելու համար, բայց այն, ինչ կատարվում է, ցույց է տալիս, որ արվում է բոլորովին հակառակը», «Առաջին լրատվական»-ի թղթակցի հետ զրույցում նշեց նախկին քոլեջի դասախոսներից մեկը:
«Կրթության և գիտության նախարարի որոշումը ոչ մի տրամաբանությամբ չի կարող արդարացվել, և մանկավարժական մի ամբողջ կոլեկտիվ այսօր կանգնած է գործազուրկ դառնալու շեմին»,- նախագահ Սերժ Սարգսյանին ուղղված նամակում գրել են մանկավարժները:
«Այսօր մեր հանրապետությունն ունի մարդկային արժեքի թերացում, որը ղեկավարությունը կամ կառավարություը չի ընդունում, մենք հայտնվել ենք գործազրկության շեմին»,- նշեց նախկին քոլեջի դասախոս Գևորգ Եղոյանը:
Գյումրու պետական մանկավարժական ինստիտուտի ռեկտորՎարդևան Գրիգորյանը «Առաջին լրատվական»-ի թղթակցի հետ զրույցում անդրադառնալով կադրային կրճատումներին, նշեց. «Աշխատանքից ազատվելու մեծ վտանգ չի սպասվում, որովհետև նախնական հաշվարկները, դասաբաժանումները ցույց են տվել, որ ընդամենը մասնակի կրճատումներ կլինեն, և աշխատանքից կհեռացվեն հիմնականում կենսաթոշակային տարիք ունեցող մանկավարժները»:
Փայլակ Ֆահրադյան, Շիրակի մարզային թղթակից