Այսօր հրավիրված Հայ ազգային կոնգրեսի հանրահավաքում նախկին վարչապետ Հրանտ Բագրատյանի ելույթը բավական տպավորիչ էր, եւ արժանացավ հասարակությանը հավանությանը: Նա իր ելույթում անդրադարձավ երկրի սոցիալ-տնտեսական իրավիճակին.
«Սերժ Սարգսյանն ասում էր, որ բյուջեն կդարձնի չորս միլիարդ դոլար: Երեք տարի է աշխատում է, բյուջեն երկուսուկես միլիարդ դոլարից իջել է ուղիղ երկու միլիարդ դոլարի: Սա իրենց թվերն են: 2010թ. Հայաստանում միջին աշխատավարձը ամենացածրն էր` 280 դոլար, Վրաստանում` 318 դոլար, Ադրբեջանում` 400 դոլար: Հայաստանում 1996-ին միջին աշխատավարձը 1,7 անգամ ավել էր, քան Վրաստանում եւ 1,2 անգամ ավել, քան Ադրբեջանում»:
Բագրատյանի խոսքով` այսօրվա իշխանությունները մտածում են ոչ թե երկրի համար մի լավ բան անելու մասին, այլ ինչպես անեն, որ երկիրն ավելի չվատանա։ Նա նշեց, որ վերջին երեք տարիներին Հայաստանի արտաքին պարտքն ավելացել է 2.5 անգամ, իսկ արտաքին պարտքը սպասարկելու գումարները հաջորդ տարի արդեն կգերազանցեն բանակին հատկացվող գումարները. «Առ քեզ Ղարաբաղ»,-նկատեց նա։
Բագրատյանի խոսքով, երեք տարում Հայաստանի գյուղատնտեսության արտադրանքը նվազել է 15 տոկոսով, չմշակվող վարելահողերը կրկնապատկվել են։ Երեք տարում, ըստ Բագրատյանի, երկիրը պաշտոնապես լքել է 118 100 մարդ, այսինքն՝ բնակչության 3.5 տոկոսը, երեք տարում իրավախախտումները ավելացել են երկու անգամ` 7000 հանցագործությունից տարեկան 1400-ի է հասել։
«Սա է Սերժ Սագսյանի երեք տարվա աշխատանքը։ Այսպես է աշխատում ինքը»,– նշեց Բագրատյանը։
Երկրում ստեղծված իրավիճակից դուրս գալու համար Հրանտ Բագրատյանը կոչ արեց հեղափոխական պայքարի դուրս գալ։ «Ժողովուրդ այս վիճակից դուրս գալու համար մի ձեւ կա… Շատ հաճախ են ասում` չի կարելի հեղափոխական պայքար, Ղարաբաղի խնդիր կա: Տո հենց հանուն Ղարաբաղի համար էլ պետք է լինի այդ հողափոխական պայքարը»,– ասաց Բագրատյանը, որից հետո բազմությունը սկսեց վանկարկել` «Այո, հիմա, հիմա»:
Բագրատյանը շարունակեց. «Ես այս տարի եղել եմ հերթով` Թունիսում, Եգիպտոսում, Հորդանանում, ու իմ գլխում մտել են հետեւյալ բայերը` եգիպտանալ, թունիսանալ, ղրղզանալ, հորդալ: Սա ձեր միակ փրկությունն է»։
