Օգոստոսի 11-ին Գեղարքունիքի մարզի Ծաղկունք գյուղում կանցկացվի «Նավասարդ-թոնրատուն» փառատոնը: Մինչ տոնի պաշտոնական բացումը` օգոստոսի 10-ին Արագածի գագաթին կվառվի կրակ, և օգոստոսի 11-ին այդ ջահը կբերվի Հայկ Նահապետի արձանի մոտ, որտեղ կլինի հուշարձանի պսակադրման հանդիսավոր արարողություն:
Միջոցառման կազմակերպիչներից «Սերունդ» հայապահպան միավորման ՀԿ-ի տնօրեն Հայկ Չոբանյանը լրագրողների հետ հանդիպմանն ասաց, որ առկա է նախաձեռնություն՝ օգոստոսի 11-ը օրենսդրորեն հռչակել «Ազգային ինքնության տոն»:
Միջոցառման կազմակերպիչներից է նաև Հայ խոհարարական ավանդույթների զարգացման և պահպանման ՀԿ-ն, որի նախագահ Սեդրակ Մամուլյանը տեղեկացրեց, որ տոնի ընթացքում կցուցադրվեն նաև հայկական ավանդական ուտեստեր. «Կլինի 8 թոնիր, որտեղ կցուցադրվի ուտեստների պատրաստումը, իսկ օրվա գլխավոր ուտեստը կլինի քաշիկան, որը հարիսայից տարբերվում է միայն նրանով, որ չի խառնվում: Սա ունի այն խորհուրդը, որ տարին խառնակ չլինի»:
Փառատոնի հովանավորը «Ծաղկունքի բաց դպրոց» հիմնադրամն է, որի խնդիրը հայկական ավանդույթների պահպանումն է:
Նշենք նաև, որ տեղում ցուցադրվող ուտելիքները վաճառվելու են: Անվճար ավտոբուս, որը երևանցիներին կփոխադրի Ծաղկունք, չի նախատեսվում:
