Այսօր լրագրողների հետ հանդիպման ժամանակ «Հովհաննես Իմաստասեր Կաթողիկոս Օձնեցի» բարեգործական հիմնադրամի գործադիր տնօրեն Վանուշ Շերմազանյանը և ճարտարապետ Համլետ Խաչատրյանը խոսեցին Օձունի եկեղեցին հիմնանորոգելու հարցի շուրջ:
Հիմնադրամի գործադիր տնօրենը նշեց, որ հիմնադրամը մի քանի ամսվա ընթացքում բարդ ճանապարհ է հաղթահարել, քանի որ Հայաստանում եկեղեցիների վերականգնման մասին օրենք չկա: Նա տեղեկացրեց, որ եկեղեցու վերականգնման վերաբերյալ հուշագիր է ստորագրվել եկեղեցու և մշակույթի նախարարության միջև:
«Նախարարությունը կատարում է նախագծային աշխատանքները, իսկ եկեղեցու վերահսկողությամբ և աղոթքով կատարվում են այլ աշխատանքներ: Ծախսերը, նախնական հաշվարկներով և պայմանագրով, 320 մլն դրամ են կազմում, բայց կամարաշարի վերականգնումը և քարհանքի վերագործարկումը դրանում հաշվարկված չեն:
Սեպտեմբերի կեսերին տուր ենք կազմակերպելու, և բոլորը կծանոթանան աշխատանքներին, կտեսնեն, թե աշխատանքներն ինչ փուլում են: Հուշագրի համաձայն` պետք է թափանցիկորեն աշխատենք»,- մեկնաբանեց Վանուշ Շերմազանյանը` հավելելով, որ նման գործունեությունը թեթևացնում է պետության գործը:
Ճարտարապետ Համլետ Խաչատրյանը նշեց, որ եկեղեցին վերականգնվելու է աթենքյան սկզբունքների համաձայն` այն նույն քարով, ինչով կառուցված է եղել: